Bulak nga nabasa sa luha

Dunay gabii nga dili siya makatulog nga bisa’g unsaon niya’g piyong ang iyang mga mata, dili gyod siya makatulog.

Upat na ka gabii nga ingon niini ang iyang kahimtang, sukad gibuwagan siyang Shirly. Tulo na ka tuig ang ilang relasyon, apan dihang gikaila ni Shirley si Dante, ang usa ka enhinyiro nga maoy hepe sa usa ka power plant nga nahimutang duol sa ilang yuta, ingon sa nausab na ang babaye. Ug nabalitaan niyang nagkarelasyon na ang duruha.

 “Shirly, tiawtiaw lang diay ang imong gugma sa akoa,” kahilakon si George nga namulong. “Sulod sa tulo ka tuig, ingon lang ana ka sayon, nga imo na kong hikalimtan ug imo kong giilisan og usa ka engineer ... sakit, Shirly, sakit kaayo.”

 Sukad niadto, wala na sila magkita ni Shirly. Milabay ang daghang katuigan, milampos ang negosyo ni George nga karne sa baka ug baboy. May gitukod usab siyang bag-ong flower shop nga gidumala ni Nenita, klasmet niya kaniadto sa hayiskul. Dalaga si Nenita ug buotan kaayo kini. Mao kini bread winner sa ilang pamilya. Daghan ug nagkalainlaing mga matahom nga bulak ang naa karon sa tanaman ni George.  Usa ka adlaw samtang nag-snack sila si George ug Nenita sa duol sa flower shop, may usa ka babaye nga niwangon nga nangayo’g katahoran.

“George, wala ka na makaila nako, ako ni si Shirly,” hinay ang tingog ni Shirly nga mipaila. “Ikaw man diay, ang tag-iya niining flower shop, gusto unta ko nga mosulod pagka flower care-taker sa imong hardin, kana kon mosugot ka...”

“Duna na man koy tag-alima sa akong flower shop, Shirly, ug siya si Nenita, nahinumdom ka, klasmet nato. Dili sab ko gusto nga makasulod ka dinhi, kay basin og mabasa sa mga luha ang akong mga bulak ... si Nenita, siya ang matahom nga bulak dinhi sa akong flower shop,” ug iyang gikuptan ang kamot ni Nenita. Dihay mga luha sa mga mata ni Shirly kay naa pa kaniya ang kasakit sa pagbiya kaniya ni Dante. (Kataposan)