Kinawatkawat nga panagtagbo

Mao na kini ang katapusan nilang panagtagbo ni Leslie. Kay mao may gusto ni Ruben nga putlon na nila kining  ilang relasyon. Usa ka dakong sala kining ilang gibuhat. Duna siya’y asawa ug si Leslie dunay bana. Nagmata lang intawon og buntag ang ilang mga kapikas ug sila si Leslie kanunay lang manulod sa usa ka motel aron tagbawon ang lawasnong kahinam.

“Leslie, dakong sala kining atong gibuhat,” hinay ang tingog ni Ruben nga maguwang lang sa hagawhaw. “Bisan tuod og dili makahatag og katagbawan ang imong bana, apan buhi pa siya ... naa pa nagpitokpitok pa ang mga mata. Ug ako sad, naa  pod ang akong asawa dakong buhi ug nagpadayon sa pagmahal kanako bisan luyo sa akong paglimbong.”

“Tingali, kini ang katapusan natong panagtagbo sulod sa usa ka motel,” miigham si Ruben ug mibangon ug nagsul-ob sa iyang brief ug midagkot og sigarilyo. “Nakonsinsiya na ko, Leslie.”

Wala motingog si Leslie, nagpakahilom lang. Unya, miuna siya’g gawas sa motel. Sa pag-abot ni Ruben sa ilang balay gisugat siya sa buotan niyang asawa ug diha pod ang duha niya ka mga anak.

“Uy, Dong, nabuntagan lagi ka, ni-overtime ka?” pakisayod sa iyang asawa.

“Oo, Day, ayawat na lang,” namakak siya.  Unya usa ka adlaw’ng Domingo nakahukom si Ruben nga mokumpisal siya sa iyang mga sala. Sa iyang pagduol sa may kompisalan napahunong siya kay maoy iyang nakita si Leslie nga nagluhod sa kompisalan. Pagka human sa pagpangompisal niini, ug kay wala man makakita kaniya si Leslie mipuli siya’g luhod aron mokompisal ug didto iyang gikompisal ang tanan niyang mga sala, labi na sa iyang  pagpakighilawas og laing babaye nga dili niya asawa. Tingali, si Leslie, sama kaniya nagbasol na usab ug naghinulsol na sa iyang mga kasal-anan. Human siya bendisyoni sa pari, migawas siya sa simbahan, ug gaan kaayo ang paminaw ni Ruben sa iyang kaugalingon, daw duna nay hugas ang lama sa iyang pagkatawo. Karon, magbag-o na siya, ug mao nay iyang atubangon ang mga maayong buhat alang sa iyang pamilya.  (Katapusan)