Human makahatag si Nito og P100 sa grupo sa mananaygon sa iyang balay, nakapanglingo siya nga naniid sa maong grupo nga gilangkuban nilang Rael, Samuel, Elden, Pons ug Gally.
Kay sa miaging semana nga nanaygon ang maong grupo sa iyang balay, nabiktima gyud ang tulo niya ka mga manok nga igtatari sa tangkal. Mga amerkano ug tag-as og dugo ang 15 niya ka mga hiniktan nga igtatari nga dili momenus ang presyo sa tag P5,000 ang matag usa. Porbida! Nakawat gyud ang tulo ka mga hiniktan!
Sukad gud mobiyudo si Nito ug nag-inusara na lang nga nagpuyo sa iyang balay, gihimo na niyang kalingawan ang pagpanari ug pag-apil og derbi sa mga bulangan. Ang iyang duha ka mga anak babaye nga lisensiyadong nars, pulos na nangaminyo og Amerkanong negosyante, atua na manimuyo sa Amerika. Hayahay ang kahimtang ni Nito bisan usa na siya ka senior citizen, kay padalhan man siya og binulang alawans sa duha niya ka mga anak nga nars gikan sa Amerika. Pun-an pa sa iyang binulang pensiyon nga madawat gikan sa GSIS, isip retiradong maestro sa publikong elementaryang eskuylahan sa siyudad.
Hilom gyud nga naglagot si Nito nga naghunahuna sa grupong mananaygon nilang Rael, Samuel, Elden, Pons ug Gally matag singabot sa Pasko, kay sila ang mga mananaygon nga may modus-pagpangawat sa mga hiniktan ug hinayhinay sa mga branded nga mga panapton ug sapatos.
Pulos man gud nagumon sa paghithit og shabu ang maong grupo sa mananaygon. Kini ang hinungdan nga gibaligya na lang gyud ni Nito ang tanan niya nga mga igtatari nga hiniktan.
Taudtaud nagkaguliyang ang atbang nga kabalayan. May kusog nga misinggit.
"Nadakpan na gyud ang grupo sa mananaygon nga mga kawatan og mahalong mga hiniktan nga igtatari, mga branded nga panaptong hinayhay, mga sapatos ug pagpangguyod og kandeng...!"
Nakapanglingo si Nito. Maoy nalantawan niya sa atbang ang mga pulis, kauban ang mga barangay tanod nga miposas nilang Rael, Samuel, Elden, Pons ug Gally nga nagduko nga naglakaw. Usa sa mga barangay tanod maoy nagbitbit sa sista sa maong kawatan nga grupo nga mananaygon niadtong gabhiona. (Katapusan)