May gitago ang kangitngit

Gula 75

Wala na gayud makita pa sa kapolisan ang maestra nga si Mrs. Tommi didto sa dapit diin siya nahanaw.

Misamot ang katahap sa mga polis nga si Mrs. Tommi mao gayud ang pangulo sa Bangkulis Black Brotherhood.

Nianang pagkabuntag, nabaniog sa tibuok lungsod nga may batang babaye na usab nga gipatay.

Gilabay kini sa ubos sa tulay sa Barangay Pundol. Gituohan sa kapolisan nga mga sakop sa kulto na usab ang responsable sa maong krimen.

“Nasayod na ko kinsa ang pangulo sa mga Bangkulisan, sir,” giingnan ni SPO1 Nicko Bernal ang hepe nga si Chief Inspector Dindo Raval.

“U-unsa?” nakugang ang hepe. “Ki-kinsa, Nicko? Kinsa ang giingon mo nga pangulo sa kulto.”

“Si Mrs. Biangca Tommi, ang magtutudlo sa Maslog Elementary School,” ni Nicko.

Nahitutok ang hepe kang Nicko. Nakasabot si Nicko nga ang hepe wala mutuo sa iyang gisulti.

“Giunsa mo man pagseguro nga si Mrs. Tommi ang pangulo sa Bangkulis Black Bortherhood? Dili kana katuohan, Nicko.”

“Wala lang kami mosulti nimo, sir, pero pipila na ka gabii nga gipanid-an namo si Mrs. Tommi tungod kay nagduda kami nga may kalabotan gayud siya sa kamatayon niadtong bata nga gipatay sanglit siya ang labing ulahing nakita nga gikakuyog sa bata sa buhi pa kini.” (Sumpayan)            `