Dokumento sa pagpanunod ug pagdelegar

Samtang tua pa sa America, si Gina namatyan og bana nga Amerikano. Nabiyuda siya sa edad nga 45. Wa siya’y anak kay gawas nga tiguwang na iyang bana, gi-vasectomy na sa batan-on pa. Nahulog lang siya’g caregiver sa iyang bana.

Bugtong siyang anak ug patay na sab iyang mga ginikanan dinhi sa Pilipinas. Kay maayo ang trabaho niya sa Amerika ug dako’g suweldo, wa siya’y ganang mopauli sa Pilipinas. Apan mouli lang siya’g kadiyot aron hikayon niya iyang papeles sa yuta nga napanunod niya’s iyang mga ginikanan. Iya na lang ibaligya ug ipiyal niya ni Linda iyang suod nga ig-agaw, ang pagbaligya niini.

Kay suheto si Linda sa pagpangahente og yuta, siya na tanan ang gipiyalan ni Gina sa pagduol og abogado sa pagpahimo sa mga dokumentong gikinahanglan. May silingan si Linda nga abogado. Si Atty. Ted Relago. Kay silingan lagi, maoy iyang giduol. Gipabayad siya’g P1000 sa paghimo og Special Power of Attorney nga pirmahanan ni Gina pabor ni Linda. Paghuma’g himo, gipirmahan ni Gina ug gidala ni Linda sa opisina sa Register of Deeds aron iparehistro. Nakugang si Linda sa pulong sa document examiner sa maong  opisina. Dili marehistro kay way notaryo. Apan bisa’g notaryado pa, di gihapon marehistro kay sayop nga pagkahimo. Kay ang yuta nga sinunod sa heredero gikan sa patay na nga tag-iya, kinahanglan nga ang dokumento modeklara nga gipanunod sa heredero ang yuta isip manununod o heredero, unya giotorisahan niya ang iyang tawo sa pagbaligya ug pagpirma sa deed of sale.

Nakahukom na lang si Linda nga moduol og laing abogado. Ug nakahunahuna siya ni Atty. Serge Indig nga bag-o lang niyang nakumpare. Kay iyang anak nga si Erwin naminyo sa anak sa abogado, nga si Carlyn. Nibisita sila’s Linda ug Gina sa bupete ni Atty. Indig, tulo ka adlaw sa di pa mobalik si Gina sa America. Gihimoan sila sa abogado og Extrajudicial Settlement of Estate with Special Power of Attorney. Nipirma si Gina ug ginotaryohan ni Serge. Nakaginhawa luag si Gina nga nahimoan na gyud og husto nga dokumento iyang yuta.

“Pila may akong obligasyon, attorney,” ni Gina. “Puwede rag wa, oy. Kay iyaan na man ka’s akong anak” ni Serge. “Di mi mosugot og libre, attorney. Mobayad man gani ta’s laing tawo, sa paryente na hinoon dili? Kun giila na mi nimong paryente” ni Gina. “Sige. “P500” ni Serge. “Usa ka libo lang” ni Linda. Nitunol og usa ka libo ni Serge. “Dugangi og usa ka libo,” ni Gina nga mapahiyumon. Di man sila mosugot nga di siya modawat. Gipakita lang nila ilang kahimuot nga bisa’g dili silingan ang abogado, dili manonto ug di kamaong motinonto. (Kataposan)