Misuka si Tasyo

Giagda ni Tibur si Tasyo nga mamista sila didto sa isla Buwad-Labtingaw ug mipasalig si Tibur nga segurado gayong maglad-ok sila sa kabusog kon tua na sila didto.

Ug mipasalig si Tibur nga inig pauli nila segurado gyung duna sila’y ma “bringhouse” kay mao gyu’y batasan didto sa taga Buwad-Labtingaw nga mopadala’g mga adobo, mantika ug uban pang mga kinuposan nga mga tungol, ilogon, atay ug uban pang mga naa sa sulod sa baboy ug baka ba. Pero matud pang Tibur, dili gyud masipyat ang mga adobo ug mantika nga sinulod na’g botelya.

“O, sige, Pre, adto ta,” uyon ni Tasyo. “Gimingaw na pud ko’g karne, Pre, uy. Puol na man pud nga magsige ta’g kaon og isda ug utang kamunggay.”

Mipahiyom si Tibur. Tuod, hapon silang nangabot sa isla Buwad-Labtingaw sakay sa usa ka de pasaheroan nga bangka de motor. Alegre ang isla sa ilang pag-abot. Giabi-abi dayon sila sa mga kaliwat ni Tibur ug gidalitan sila’g  lamiang mga potahe ug dihay sea foods, mga sinugbang nukos, kitong, barilis ug uban pang mga dagkong isda ug diha pa gani kinilaw nga tangigi. Naglad-ok sa kabusog si Tasyo ug si Tibur.

Unya may nasigpatan si Tasyo nga usa ka tiguwang nga puti na kaayo’g buhok nga mora’g dunay gihunghong kang Tibur. Miyangoyango si Tibur nga mora’g miuyon. Ug miduol kang Tasyo si Tibur. “Pre, magpahilis ta, dunay bino didto sa pantawan, tana,” giagbayan ni Tibur si Tasyo. Nag-inom sila ug duna sila’y gisumsom nga adobong tungol sa baboy. Dihay kaliwat ni Tibur nga misagol ug maoy tigkuha og bino kun mahurot na. Nahubog sila si Tibur ug Tasyo. Ug nakatulog silang duha. Ug sa sayong buntag migikan sila sa isla ug gipadad-an sila’g daghang adobo. Nahimuot si Tasyo. “Ngilngiga diay sa imong mga kaliwat didto sa isla kun magpista, pre, no,” ni Tasyo pa. “maglid-ak man ta sa kabusog. Grabe pang-inom ug unya padad-an pa gyud ta’g “bring house” na nia ay, daghan kaayong mga adobo.”

“Mao gyud nay ilang kinaiya, Pre, ug ingon sa kultura na kana sa among kaliwat sa isla Buwad-Labtingaw,” hinay nga sulti ni Tibur. Pag-abot nila sa ilang tagsatagsa ka balay, didto sa ilang Tasyo gidunol dayon niya ang dakong silopin nga gisudlan sa mga adobo ngadto sa iyang asawa. Miduaw diay kaniya ang iyang uyoan nga albularyo nga si Ingko Pitong. Miamen si Tasyo ug unya kalit lang midigwa si Tasyo ug misuka taman sa ginhawa. Nagatuwadtuwad og suka si Tasyo nga mora’g naluya na.

“Gipatakdan si Tasyo, Imak,” ni Ingko Pitong pa ngadto sa asawa nga gibati’g kahingawa. “Tan-awa ang iyang mga sinuka dunay sagol nga mga ulod.” Ug human katambali si Tasyo sa iyang uyoan naulian siya ug ang mga adobo gipalabay sa ilang uyoan ngadto sa lungag sa karaang atabay. (Kataposan)