Anghel nga magbalantay

Nagdukaduka si June nga nagsakay sa trak dekarga, kargahanan og isda gikan sa Bogo ngadto sa Pasil. Truck boy siya sa negosyo sa iyang Tiyo Tomas nga trucking. Naglingkod siya sa kahon sa isda sampig sa walang bongbong sa dekarga. Unya nahitagpilaw siya nga naglingkod, ug nagsandig sa bongbong sa dekarga samtang nagdagan kini.

Ala una sa kaadlawon nigikan sa Bogo ang dekarga. Nakurat ug nalisang si June sa kusog nga tay-og paka sa sakyanan. Mao na lay iyang namat-an nga di na siya kalihok. Kay naipit iyang mga tiil sa dagkong kahon sa isda. Ug ang  dekarga wa na mag-andar ni magdagan.

“Naunsa man ta Yong?” sampit ni June ngadto sa drayber nga si Yongyong. Way tubag.

“Raul! Rene! Naunsa man ta?” sukot niya sa duha ka laing truck boy nga naglingkod sa front seat. Wa gihapoy tubag. Gikulbaan si June.

Nagsugod nag kabanhod ug pagsakit ang iyang mga tiil nga naipit. Gianinaw niya ang palibut. Nia ang dekarga tungod sa dakong bilding sa San Miguel Brewery. Daplin sa taytayan. Dapit sa too. Nabangga diay ang dekarga sa barandilyas sa taytayan. Seguradong nakatulog si Yongyong samtang nagmaneho. Mingaw pa ang kalikupan.

“Diyos ko. Tabangi mi! tuaw ni June.

Kalit lang may nitunga nga dakong tawo. Taas ug maskulado. Giwaling ang mga kahon nga nakaipit ni June. Gialsa siya gikan sa dekarga ngadto sa daplin sa karsada. Gitabang sab sa tawo silas Yongyong, Raul ug Rene. Unya niabot ang ambulansiya sa ERUF. Gikarga silang upat ug gidala sa ospital.

Nalimot na lang si June sa tawo nga nitabang nila. Bun-og ra ilang naaguman. Way bukog nga nangabali. Tulo ra ka adlaw sila sa ospital.

“Kinsa may nitabang ninyo?” sa Tiyo Tomas ni June pag-uli nila sa Bogo.

“Wa man ko kaila Tiyo. Dakong tawo. Maskulado” ni June, unya nasabak sa iyang panan-aw ang karaang hulagway nga gipilit sa bongbong sa sala sa balay sa uyoan.

“Amgid-amgid anang naa sa litrato” sumpay ni June nga nitudlo sa black and white nga larawan nga gikuwadro.

“Oy! Si anhing Lolo Filemon man na ninyo! Igsoon ni anhing papa Daniel. Wa na mo kaabot ana niya” sa Tiyo Tomas ni June.

“Tinood gyud diay Tiyo nga dunay anghel magbalantay!” ni June.

Motoo sab ko ana. Kay duna gyud tay kadugo nga patay na. Unya sangonan sa Diyos sa pagbantay nato. Tarong ug relihiyosong tawo to si Lolo Filemon ninyo” sa uyoan. (Katapusan)