Kissamae ug ang gitarista - Gula 4

Giingnan ni Fe ang higala nila nga gitarista nga daw kabubut-on g’yud sa kahigayonan nga magkahinagbo sila pagbalik. Wala masayod ang duha ka call center agents nga anaa diay magkantahan si Brando sa Casino nga ilang gisuroyan.

“Sige, mag-snack usa ta’g kadiyot sa taas,” matud ni Brando ngadto sa duha ka maanyag nga higala. Nag-order si Brando og makaon ingon man juice alang kanila ni Fe ug Kissamae.

“Mora’g pagbuot g’yud tingali sa kahitas-an nga magkasuod ta kay gibagat man niya pag-usab ang atong mga dalan,” matud ni Brando.

Niining higayona gipangayoan na g’yud ni Brando og contact numbers ang iyang duha ka higala’ng mga call center agents. Mitug-an na usab sila si Kissamae ug Fe kun asa sila magtrabaho. “Wow, nindot man diay kaayo mo’g mga trabaho. Dagko pa g’yud og suweldo. Mga english paka diay ning akong mga amiga,” ni Brando pa.

Gabii na kaayo nga nagbuwag-buwag sila si Brando ug ang duha ka call center agents. Diha’ng sila na lang duha si Fe ug Kissamae, nagkataw-anay ang duha. “Klaro g’yud kaayo nako day nga may pagbati nimo si Brando,” matud ni Fe.

“Hmmm, ngano man kuno bi?” pakisayod ni Kissamae. “Masabtan kaayo day kay anha siya kanunay mosikit nimo ug daghang higayon nga nasakpan nako nga motutok siya nimo pag-ayo kun dili ka magtan-aw,” giingnan ni Fe ang amiga.

Tuod man, wala gayud mosipyat kay pag-abot ni Kissamae sa iyang gipuy-an nga lodging house duol ra sa JY Square, mi-ring ang iyang selpon ug sa iyang pagtan-aw, si Brando ang nanawag.

Aghop kaayo ang tingog ni Brando nga nakigsulti ni Kissamae sa telepono. “Gusto ka ba nga akong tudloan unsaon pagtukar ang guitar?” gisukna ni Brando si Kissamae. “Sige, sige. Gusto g’yud kaayo ko makamao nga mo-guitar,” matud ni Kissamae.

Wala magdugay ang ilang panagsultihanay sa telepono. Gitawgan dayon ni Kissamae ang higala niya nga si Fe ug gipahibalo nga mikontak kaniya si Brando. “Tan-awa, dili ba masabtan na nako nga may gusto ka ‘sab ni Brando day?” ni Fe pa ngadto sa higala. Wala makatingog si Kissamae. Nahuna-huna ni Kissamae ang gisulti niya kaganina nga dili mahitabo nga makagusto siya ka’ng Brando tungod kay maguwang kaayo kini kaniya og edad. Apan anam-anam nga gibuntog  si Kissamae sa iyang pagbati tungod sa abilidad ni Brando sa pagtukar pinaagi sa guitar. (Sumpayan)