Sa daplin sa baybayon

Mikanaas ang balod ug mialibwa’g kini dihang miigo sa malag-it nga bato sa daplin sa baybayon. Ang tinuasik sa tubig-dagat didto gayud motugpa sa akong tiilan. Nia ako karon sa daplin sa dagat. Naglingkod sa miigdal nga bato samtang naglantaw sa halapad nga kalawran ug sa mikiat nga mga balud. Buot nga tudlison sa akong panan-aw ang migimok nga dagat sa pamasin nga makita ang tubag sa dugay ko nang gihambin nga suliran.

Dinhi ning dapita sa daplin sa baybayon nahimugso ang una kong gugma. Dinhi ko hikaplagi ang babaye nga maoy mitudlo kanako kung unsa ang gugma. Apan sama niadtong balud, napusgay ang tanan dihang kalit siyang mibiya kanako ug mikuyog sa laing lalaki. “Hain ka na man karon mahal kong Maricel!” Mikibot ang akong baba sa pulong nga daw agulo nga ako lamang ang nakadungog!

“Nia ka ra man diay dinhi, Bay!” Natugaw ang akong paghinuktok sa sangpit sa usa ka tawo. Milingi ko ug nasawod sa akong panan-aw ang suod kong higala nga si Gogo. May gibitbit siyang duha ka botelya nga softdrinks ug gitunol kanako ang usa niini.

“Naa man gud koy nahinumdoman sa pag-abot gyud nato dinhi sa Marigondon Beach, Bay Gogo, mao nga mianhi dayon ko dinhi!” Nako pa dayong yarok sa softdrinks nga gihatag ni Bay Gogo kanako. “Ah, nasayod na ko’g unsa kana, Bay Leo,” ni Gogo pa dayong katawa. “Nahidumdoman nimo ang kanhi mong uyab nga si Maricel, di ba?”

Mibuhi ko’g lawom nga panghupaw dihang kalit nga mihuot ang akong dughan. “Husto ka Bay Gogo, si Maricel gyud ang akong nahinumdoman. Gihigugma ko si Maricel ug dili ko gayud siya mahimong hikalimtan. Ug kining dapita Bay Gogo ... kining dapit sa baybayon nga atong nahimutangan karon maoy buhing saksi sa una ug kataposan kong gugma!”

Milingkod si Gogo sa miigdal nga bato ug miyarok sa gikuptan niyang softdrinks. Unya namulong, “Pasabta kuno ko, Bay Leo, kun nganong dinhi matawo ang imong gugma ug dinhi sab mamatay kay naglibog kaayo ko da!”

“Hayskol pa lang ako niadtong higayona, Bay Gogo, dihang nagkasabot ang akong mga klasmeyt nga mangaligo dinhi sa Marigondon Beach. Ug atol sa among pagpangaligo, Bay Gogo, nakita ko ang usa ka babaye nga naglingkod dinhi ning bato nga akong gilingkoran karon. Nadani ko sa iyang kaanyag mao nga giduol ko dayon siya ug giilaila. Hangtod nga nagkasabot kaming duha nga magkita dinhi gihapong dapita nga kami lamang duha. Pag-abot sa maong higayon, Bay Gogo, dinhi gayud ning miigdal nga bato kaming duha nanglingkod. Unya gidigahan ko siya sa akong gugma. Ug sa wala’y lipudlipod gisugot dayon ko niya. Apan kalit lang usab siyang nahanaw nga wala gani manamilit nako. Sa kaulahian, nasayran ko na lang gikan sa iyang amiga nga gitaban siya sa laing lalaki!” Gipahiran ko dayon ang mga luha nga nanglugmaw sa akong mga mata aron dili makita ni Bay Gogo.

“Mao diay nga nakadisisyon dayon ka sa pagkuyog nako,” nagpanglingolingo si Bay Gogo nga namulong.

“Oo, Bay! Ug hugot ang akong desisyon nga mokuyog nimo. Gani, andam na man ang tanan kong dad-unon kay gitabangan man sab ko sa akong ginikanan ug mga igsuon. Ug kining beach party nato karon nga gihimo dinhi sa Marigondon beach maoy giisip nga panamilit nila kanako kay ugma sa buntag mobiyahe na man kita paingon sa kumbento!”

Pagkaugma, malipayon ko nga milakaw uban kang Bay Gogo padulong sa kumbento diin adto pagahimuon ang nahunahunaan namong bokasyon — ang pagkapari! (Katapusan)