Nauwaw unta kaayo si Zeny nga midawat sa kwarta nga gitunol kaniya ni Regner apan nahuna-huna niya nga gikinahanglan kaayo niya kini aron ikapalit og bugas.
“Salamat kaayo Regner ha? Wala g’yud ko masayud unsaon nako sa pagbawos sa imong mga kaayo nako. Gitabangan pa nimo si Papa nga makuha pagbalik ang iyang lisensya unya karon gihatagan na ‘sab ko nimo’g kwarta,†ni Zeny pa.
Nagbuwag sila sa pagpanglakaw. Miadto na si Regner duol sa City Hall nga maoy lugar nga siya nadistino. Gihuna-huna ni Regner nga daku-daku gayud ang iyang naiban sa P20,000 niya nga bonus gikan sa City Hall alang kang Zeny.
Nalooy si Regner sa kahimtang ni Zeny nga mibati gayud sa iyang amahan nga PUJ driver nga dili na makamaneho kun dili malukat ang iyang lisensya. Ang mga luha ni Zeny nga nangambak gikan sa iyang mga mata maoy nakapahukom ni Regner nga tabangan kini sa iyang problema.
Milabay ang mga adlaw, miabot na usab ang iyang day-off nga adlaw’ng Sabado. Nahukman ni Regner nga bisitahan si Zeny didto sa iyang panimalay. Gitan-aw ni Regner ang duplicate sa TOP nga giisyu niya sa amahan sa dalaga.
Nabatasan na ni Regner nga kun moisyu siya’g TOP ibutang gayud niya ang kompleto nga address sa drayber nga iyang nadakpan. Gitultol ni Regner ang address nga nabutang sa lisensya sa amahan ni Zeny.
Nagpangutana si Regner pag-abut niya sa Barangay Bulacao aron matultolan niini ang pinuy-anan nila ni Zeny. Wala gayud mosipyat si Regner kay adunay nakagiya kaniya sa nahimutangan sa balay sa dalaga.
Kun wala pa niya ingna ang iyang napangutana nga drayber og PUJ ang amahan ni Zeny maglisud unta siya pagtultol. Dili daghan ang nagmaneho og PUJ sa Villabulsita sa Barangay Bulacao mao nga dali ra kini nga natultolan.
Nasurpresa kaayo si Zeny sa kalit nga pagtunga ni Regner sa ilang panimalay. Wala gani dayon siya makaila niini kay nagsul-ob og kawo nga pinayung-yong ang traffic enforcer nga nagsul-ob usab og T-shirt.
“Hala... nganong miabut ka man dinhi sa among balay Regner?†ni Zeny pa nga nagpahiyom. Gipadayon siya sa dalaga sa ilang gamay’ng panimalay nga sikit kaayo ang mga silingan.
“Kauwaw nako uy. Sori g’yud kaayo Regner ha, unsaon pobre g’yud tawon kaayo mi,†matud ni Zeny. Nahuna-huna ni Regner nga wala siya masayup sa pagtabang sa amahan sa dalaga nga makuha pagbalik ang lisensya kay nasabut niya nga lisud gayud ang ilang kahimtang. Udto na ug kalit lang miabot ang amahan ni Zeny. “Kinsay imong bisita Zen? Uy, ikaw man diay kini sir,†matud sa amahan sa dalaga. -- Sumpayan