Ipa-feel gihapon

Dear Tita Salie,

Have a wonderful day. I am an avid reader of your column. I really enjoy reading the different problems of the people. Ganahan pud ko sa imong mga advice nga imong ihatag kanila.

Just call me “dieheart,” 22 years of age, single pa. Ang akong problem is about this man nga naglibog ko kun unsay among standing kaniya. Wala gyud ko kasabot sa  among sitwasyon karon.

Ex na nako siya, Tita, tungod kay nagbulag na man mi. Pero until now bisan wala na mi apan siya lang gihapon ang ania sa akong hunahuna ug kasingkasing, Tita. Siya lang gihapon ang kanunay nga akong gipangita. Hangtod karon wala lang gihapon ko ka move-on.

Anaa lang gihapon ang among communication hangtud karon. Mo-text lang gihapon siya nako ug dali ra usab akong maka-reply kaniya, Tita. Dunay mga higayon nga mo-text siya kay gusto niyang makigkita nako ug dili gyod ko kabalibad kaniya. Makigkita usab ko niya, Tita.

Unya kun magkita mi iya lang gihapon nga ipa-feel nako nga love kaayo ko niya bisan pa man kun dili na kami. Iya lang gihapon nga buhaton ang mga butang nga iyahang buhaton niadtong uyab pa mi. Wala gyud ko kasabot sa among sitwasyon, Tita, mosabot  ra man ko nga busy siya sa work. Unsa may akong buhaton? Palihog pasabta ko. Thank you.

* * *

Hello!

Lisod gyud langkaton gikan sa atong dughan ug hunahuna ang tawo nga nahimong tipik sa atong kasinatian. Dili sayon kalimtan labina kun siya mapinanggaon kaayo nato ug gibuhat gyod ang tanan aron kita malipayon samtang duna pay relasyon kanila. Usahay, samtang anaa pa kita sa relasyon, makaingon ta nga maayo unta og ang kinabuhi wala’y kataposan.

Mao nga kun ang maong relasyon maputol ug maundang dako kaayo ang atong panghihinayang, ug igo lamang kita sa paghandom sa mga nangagi ug usahay, malaumon nga mabalik pa unta ang maong kasinatian.  Ug gawas niini ang labing lisod nga parti sa panagbulag mao ang paghikalimot sa maong tawo nga atong gikarelasyon. Tungod kay bisan unsaon dili gyod kayang kalimtan, or dili gyod mawagtang sa atong panumdoman.

Nakasabot ko sa imong gibati nga maglisod ka paghikalimot sa imong uyab tungod kay love nimo kaayo siya. Pero ayaw usab itugot nga magpadayon ka bisan kun wala’y klaro ang inyong relasyon. Of course, pareho mong duha nga nangulila sa usa’g-usa pero mas maayo gyod unta kun klaro ang inyong standing karon kun kamo pa ba o dili na. Kun nagbulag namo ayaw una pagsige’g date kaniya kay tingali kun mahimo kang makalulooy kay dili na man mo uyab. Bisan gigamit ka lang niya ug gisakyan ang imong dakong gugma. Ang gugma dili puyde duwa-duwaan, busa, much better if maklaro nimo ang tanan.

-- Tita Salie