Babaye gipanglili

Gipasabot ni Vicente ang iyang anak nga wala siya’y pagsupak kun magkasabot sila si Noel, ang usa ka jailguard sa city jail. Hilom lang si Karlyn nga naminaw sa gisulti sa iyang amahan apan mipasiklap siya ni Noel nga nagpahiyom. “Isaad nako nimo Nong Vic nga panggaon nako si Karlyn kun iya man ko’ng sugton,” gilingi ni Noel si Karlyn nga diha sa iyang kilid. Miigking siya kay gilusnit ni Karlyn ang iyang kilid. Nakapahiyom si Vicente kay nakasabot siya nga may gusto ang iyang anak kang Noel. Gipasalamatan niya si Noel sa pagpasalig nga dili binuangan si Karlyn ug nga pakaslan niya kini kun mosugot lang kaniya. “Unya, ihatud usa nako si Karlyn Nong Vic kay hapon na ra ba,” pananghid ni Noel. “Sige, pag-ayo-ayo kamong duha,” matud ni Vicente nga naglantaw sa iyang anak nga mapahiyumon nga miuban kang Noel. Nalantawan na’ng daan ni Vicente nga magkarelasyon gayud si Karlyn ug Noel. Miangkas si Karlyn sa motorsiklo ni Noel. “Manuroy usa ta Karlyn kay total, nakapananghid na bitaw ko ni Papa nimo nga pangasaw-on tika kun imo lang ko nga sugton.”

Inay molugsong paingon sa Sitio Langub nga maoy agianan paingon sa kinaubsan, gipatungas hinoon ni Noel ang motorsiklo niadtong hagip-ot nga karsada paingon sa Camp Marina. Nanghunong sila daplin sa karsada.

Gipabarug ni Noel ang motorsiklo human sila manganaug. “Nganong dia man ta dinhi Noel? Kita kaayo sa ubos no?” matud ni Karlyn. Wala motingog si Noel. Iyang giagbayan paghinay si Karlyn.

“Ayaw ko’g pakyasa sa akong tinguha nimo Karlyn, tinud-anay ang akong pagmahal nimo. Anaa ang Ginoo nga pakaslan tika kun imo lang ko’ng sugton,” pangamoral ni Noel. Nahakatawa si Karlyn. “Tininuod na g’yud diay na kay giapil man nimo ang Ginoo. Sige sugton na tika,” ni Karlyn. “Salamat, salamat kaayo Karlyn, salamat,” daw sangko sa langit ang kalipay ni Noel. Gigakus niya si Karlyn ug gihagkan. “Wala’y makakita kanato dinhi Karlyn kay nagsugod na paghugpa ang kangitngit.”

Gihagkan sa makadaghan ni Noel si Karlyn. Nanumbalik sa iyang huna-huna kadtong hubo nga lawas ni Karlyn dihang girekisa kini sa babaye’ng jailguard ug iyang gibuso sa pikas lawak sa searching room sa City Jail.

Daw gidaug si Karlyn sa mga parayeg ni Noel. Anam-anam na gayud nga mihugpa ang kangitngit. “Ayaw baya ko’g pahilaka lang ha? Bantay ka baya kun imo lang ko nga binuangan,” ni Karlyn nga may sagol-kabalaka.

May gihunghong si Noel kang Karlyn. “Dili ko uy, mumabdos pa lang ko,” paraygon ang tingog sa dalaga. Apan nadala si Karlyn sa mga parayeg ni Noel ug miuyon na lang nga mokuyog kini sa mabugnaw’ng dapit. -- Kataposan