Dili na ko gusto’g kagubot. Dili na ko buot nga masubli pa kadtong nahitabo sulod sa hotel sa dihang nasakpan kami si Walter ni Daniel nga nagdula sa kalayo. Gusto nakong tarongon na ang akong kinabuhi ug dili na magpaka-uwaw pa.
Duna koy silingan nga lalaki nga sipat kaayo. Magsige siya’g panaghoy kun makakita kanako. Kidhatan ko niya sa higayon nga magkasugat kami. Apan wala ko siya tagda. Wala ko mopakita og pag-care ngadto kaniya aron dili mag-anad. Nasayod kong naibog siya nako pero wala lang siya makaatraka kay wala man nako hatagi’g higayon nga makaarangkada siya. Dili ko gustong magluib kang Walter. Kun moduol siya sa nagduwa og baraha, modali dayon ko og balik sa among balay. Apan midaog gayod ang akong kahuyang. Miabot ang panahon nga wala ko makalikay sa tentasyon dihang gikaila nako si Darwin. Gikahimamat nako si Darwin sa parkingan, og tricycle sa Punta Princesa. Nagkadungan mi pagsakay. Duna siya’y giadto sa Bon Bosco kay nagpahimo siya og hulmahan sa kandila. Usa siya ka negosyante og kandila.
Sa iyang pamarog, maila nga arangan og kahimtang si Darwin. Luho siya’g lifestyle. Dako gyud tingali ang iyang negosyo. Bisan nag-commute lang siya sa among pagkita. Labaw sa tanan, guwapo si Darwin. May charisma ug kusog ang sex appeal niya nga wala nako makita sa ubang mga lalaki, lakip na ang mga lalaki nga nahilambigit sa akong kinabuhi. -- Sumpayan pa