Langoy-langoy

Ning buntaga nagtapok na usab ang kabataan sa dakong linaw sa Biasong nga maoy kaligoanan sa tanang molupyo sa baryo, tungod sa katin-aw sa tubig niini. Mora’g naporma og swimming pool ang dakong linaw gikan sa agos sa sapa nga mipatighulog sa kinaubsan.

Sadya kaayo ang mga bata nga nagsugod na sa paglangoy-langoy sa tin-aw nga tubig sa dakong linaw. Dunay bahin sa linaw nga lawom ug dili matugkad sa kabataan nga angay lamang sa makamaong molangoy. Ug duna say bahin sa linaw nga taga hawak sa mga bata ang giladmon, nga haom lamang gayud sa mga bata nga dili makamaong molangoy.

Sa matag karon ug unya, mokawas ang mga bata sa tampi sa linaw ug magdungan paglayat sa pagtimpasaw sa tin-aw’ng tubig, dayong salom. Igo lamang naniid si Jayjay sa kaubanan niyang katalirungang kabataan sa baryo nga malipayon kaayong naglangoylangoy. Diha lamang gayud siya sa tagahawak nga tubig sa linaw kay dili man siya makamaong molangoy.

“Bay Jay, dali dire sa lawom nga tubig aron ka makamaong molangoy!” singgit ni Junjun kang Jayjay nga mikawas na sa tampo sa linaw. “Bitaw, Jay! Unsaon nimo pagkat-on paglangoy kun anha lang ka sa mabaw! Dali, timpasaw dire sa lawom nga bahin...!” nagpangamay usab si Bobok kang Jayjay dayong langoy ug salom sa lawom nga tubig sa linaw.

“Apan igo lang nga nagpanglingo si Jayjay nga nagtindog sa tampi sa linaw. Kulhanon siya nga magtuon sa paglangoy.

“Ari lang ko’s mabaw nga bahin sa tubig sa linaw, mga abay!” pamalibad ni Jayjay. Wa siya’y kalibutan nga diha na sa iyang luyo si Boyaks, iyang silingan nga katalirungan ug klasmeyt niya sa Grade Six. Unya, gikalitan og tukmod ni Boyaks si Jayjay ug mitimpasaw kini sa lawom nga tubig sa linaw.

“T-tab-ang...! Tab-ang...!” nagpusnga-pusnga si Jayjay nga misinggit og pakitabang. Nag-ulpot-ulpot siya sa lawom nga tubig nga nagwara-wara sa iyang mga kamot nga motidlom ug unya, mopaibabaw.

“Sige! Langoy, Jay! Ikalipay namo nga makamao ka nang molangoy! Ikapay imong mga kamot...!” miabiba pagsinggit ang tanang kabataan nga naniid ug gipasagdan si Jayjay nga moulpot ug mounlod sa lawom nga tubig.

Naningkamot si Jayjay. Paspas nga mikapaykapay siya sa iyang mga kamot. Unya, migaan iyang lawas. Namatidkan niya nga milutaw na siya. Naglangoy-langoy na siya. Makamao na siyang molangoy!

Ug nabati ni Jayjay ang suliyaw sa katalirungan niyang kabataan sa baryo, dihang nakakat-on na gyud siyang molangoy. (Kataposan)