Paglikay nga dili magamit sa politika ang Pantawid Pamilya

Ang eleksiyon sa Mayo ang hinungdan kun nganong hunungon una ang paghatag sa Pantawid Pamilya ngadto sa mga nakabenepisyo niini. Adunay igong katarongan ang Department of Social Welfare Development niini. Dili man gayod kalikayan nga adunay anaa sa gahom karon nga mopahimulos niini. Mahimong gamiton sa usa ka politiko nga dili hatagan niini kadtong dili mobotar kaniya.

Gipasabot ni DSWD Secretary Soliman nga walay labot ang mayor, o kaha gobernador ug kongressman sa maong programa sa gobiyerno. Dili angay mahadlok si bisan kinsa man nga nakabenepisyo niini nga matangtang sa listahan nga maniobrahon sa mga lokal nga naglingkod sa puwesto.

Ang makatangtang lamang sa listahan sa nakabenepisyo sa Pantawid Pamilya mao ra ang DSWD. Adunay ipahigayon nga imbestigasyon ang maong ahensiya kun makadawat sila’g reklamo bahin sa usa ka nakabenepisyo niini nga dili unta angay hatagan apan nakadawat.

Kun mamatud-an sa imbestigasyon, tangtangon gayod siya sa listahan aron mahunong na siya sa pagka-benepisyo sa maong programa sa gobiyerno. Adunay mga huhungihong nga may ubang pamilya nga nakabenepisyo sa Pantawid Pamilya nga ang kuwarta wala gamita alang sa kaayohan sa mga anak. Hinuon, gigamit kini sa sugal, sa inom ug gipamalit og mga appliances.

Init kaayo ang politika dinhi sa atong nasud ilabi na kun adunay ipahigayon nga eleksiyon. Kadaghanan sa mga politiko sa Pilipinas dili gustong magpapilde. Buhaton ang tanan aron makadaog, apil na niini ang pagpanikas, pagpanghadlok ngadto sa mga botante ug uban pa.

Kun buot sabton, husto ang gibuhat sa DSWD sa pagsuspenso una sa pagpanghatag sa Pantawid Pamilya ngadto sa mga nakabenepisyo niini. Aron paglikay nga gamiton kining maong programa sa gobiyerno sa mga hakog sa gahom nga dili gustong mokanaog sa gilingkorang puwesto.

Sagad ra bang buhaton niining maong matang sa politiko aron botaran siya sa eleksiyon mao ang pagpanghadlok sa mga botante.

Apan kining maong buhat anaa ra gayod sa mga botante, kun mobarog ba sa katarong o magpadala sa kahadlok ug pagpanikas. Labaw sa tanan, anaa ra sa mga botante kun ibaligya ba niya ang balaanon niyang boto o gamiton niya kini sa tinarong isip iyang katungod sa pagbotar.