Ang christmas tree ni Olivia

Sukad mipanaw ang iyang bana nga si Michael ingon sa wala na ganahi si Olivia nga mohimo’g mga dayandayan panahon sa Pasko. Karon lang, ang ila ra gyong balay ang wala pay mga christmas decoration samtang ang iyang mga silingan nangumbitay na ang mga matahom kaayong dayandayan sa Pasko.

Makita sa mga balay sa iyang mga silingan ang mga nanagbitay nga mga parol ug may mga hulagway pa nga plastic nga iya ni Santa Klaus. Ug duna pa gani mga krismastri, apan ilang balay morag maingon nga walay “spirit of Christmas” kay nagmingaw na man lang nga dili parehas sa uban diha nga nagpid-ok pid-ok na ang mga series light sa ilang mga Christmas tree.  Unya usa ka hapon samtang naglingkod si Olivia sa ilang pantawan, miduol kaniya si Albert.

Kini si Albert suod nga higala sa iyang bana ug ulitawo pa nagtrabaho sa usa ka dakong planta sa semento kay usa man kini ka  Engineer. Atbang ra ang balay nila ni Albert sa ilang balay. Apan makapahibulong kay sukad mamatay si Michael karon pa gyod mahitabo nga mibisita kaniya si Albert, ug likodlikod pa gyod sa Pasko.

“Wala ko makasamok nimo, Ol?” ni Albert pa.

Nakurat si Olivia miabiabi sa ulitawo. Dako usab ang balay nila ni Olivia kay kadto si Michael usa man usab ka Engineer sama kang Albert ug mahiligon sa mga moderno ug matahom nga balay.

“Dayon, dayon, uy, Albert,” agda ni Olivia. “Lingkod...”

“Salamat,” sa ulitawo pa. “Akong namatikdan ingon sa walay nagsiga nga mga Christmas Light dinhi sa inyong balay, ngano man?”

“Dili lang ko gusto, Bert,” mubong tubag sa biyuda.

“Pagbutang og mga Christmas Decoration dinhi sa inyong balay, uy, Olivia, aron pod malipay si Brod Michael nga magtan-aw bisan og tua na siya sa laing kalibotan. Para lang god sa mga bata. Si... si Michelle, hain man?” milingilingi si Albert.

“Tua sa iyang Lola, ug ako ra ang nahabilin dinhi ron, Bert,” hinay’ng tubag ni Olivia. Unya ingon sa may halawom nga gihunahuna si Albert, dayon namulong: “Olivia, ambot lang kun motuo ka ba ining akong isulti nimo ron. May gitugon kadto si Brod Michael nga ... nga pabantayan mong duha ni Michelle nako.  Ug kay wala man ko motuman, kanunay kong padamgohon ni Brod Michael ... busa, nia ko ron...”

Igo lang mipahiyom si Olivia nga mitutok sa ambongang hitsura ni Albert. Dili bakakon nga tawo kini si Albert ug mituo siya sa gisulti niini. Unya, kay gusto man ni Albert nga magbutang na sila’g mga dayandayan sa Pasko karong adlawa, misugod dayon sila sa pag-decorate sa sulod sa balay. Ug kay may dalang mga series light si Albert misulod sa iyang kuwarto si Olivia ug gipagawas ang usa ka plastik nga Christmas Tree nga pinalit niadto ni Michael.

“Uy, maayo kay duna kay Christmas tree, Olivia,” ni Albert, nga midawat sa gidala sa biyuda. “Nindot ning butangan og mga series light. Imo ning pinalit?”

“Si Michae ang nagpalit ana,” hinay’ng tubag ni Olivia.

Ug mikidlapkidlap dayon ang  mga series light nga gilibot sa gipabarog nga Christmas Tree. Pagka Noche Buena mibalik si Albert ug nagdala’g daghang mga pagkaon alang sa pagsaulog nila sa Pasko.

“Olivia, Merry Christmas kanimo,” gikuptan sa ulitawo ang tuong kamot ni Oliva kinsa wala lang mobadlong sa ulitawo. “Unta, sama nianang imong Christmas Tree, ang akong gugma nimo, puno sa naggilakgilak nga pagbati...”

“Ha, kuan ... kuan, Albert ... unsay buot mong ipasabot...?”

“Mahal ko ikaw, Olivia. Si Brod Michael wala na, ug nia ko andam magmahal kanimo, bisan pa sa kaliboan ka mga Pasko nga moabot sa tong kinabuhi...” Ug dihang mipakapaka ang mga lubentador sa may tugkaran, nahagakos si Olivia kang Albert kinsa migakos usab kaniya. (Katapusan)