Nagdali sila si Joy ug Tacio pag-adto sa banko kay hapit na ang alas tres sa hapon. Igo lang sila nga nakasulod, misirado na ang gwardya ug wala na magpasulod.
Gihatag dayon ni Joy ang tseke ngadto sa cashier human kini mahiling sa clearing officer. Nagtupad sila sa paglingkod si Joy ug Tacio samtang nagpaabot nga motawag ang cashier. “Daku diay ang akong makobra Tass no?” matud ni Joy nga ingon sa dili makatoo sa kantidad sa tseke.
“Kadto gud diay’ng imong bana nahimo siya nga miyembro sa SSS sa kapin na sa 30 ka tuig. Bisan gani og napulo ka tuig pensyonado ka na man mao nga kay 30 man ka tuig, duna kay lump sum ug magkobra ka pa gayud og binuwan unya,” pasabut ni Tacio kang Joy.
May misantup sa huna-huna ni Tacio. Gihimangnoan si Joy. “Ang lagda mao nga ang asawa sa mamatay nga miyembro sa SSS magpadayon nga magdawat og pensyon apan maputol kini kun siya magminyo.”
“Hala, mao ba?” daw nakahinuktok si Joy nga mora’g adunay gihuna-huna. Napugwat ang iyang paghinuktok dihang gitawag sa cashier ang iyang ngalan. Gipirmahan ni Joy ang luyo sa tseke ug gitunol sa cashier kaniya ang baga kaayo nga tagsa ka libo ka pesos nga papel de banko.
Naghakgum si Joy sa daghang kwarta nga mibalik sa nahimutangan ni Tacio. “Tass, tinuod g’yud ni? Wala ko magdamgo? Kapin sa four hundred thousand pesos kadtong tseke nga akong gipirmahan,” matud ni Joy nga pwerteng lipaya.
“Ayaw na lang balik sa opisina Tass, ubani ko kay mopauli ko sa balay unya manglakaw dayon ta kay magdeyt man kaha ta,” giingnan ni Joy si Tacio. Kabalibaron si Tacio kay wala siya makapananghid sa iyang division manager. Apan mapugsanon kaayo si Joy nga nahadlok nga duna siya’y dala nga daghang kwarta.
Nagtaksi sila paingon sa balay ni Joy. Pagkanaug nila, mingaw ang palibut kay alas 3:20 pa sa hapon ug tingali namahuway pa ang mga tabian nga silingan ni Joy. “Dali sulod, bahala na’g makakita nimo ang tabian nako nga mga silingan,” ni Joy pa .
Giihap nila pag-usab ang binandol nga kwarta. “Hatagan tika Tass og twenty five thousand nga pahalipay sa pagtabang nimo nako,” matud ni Joy nga mitunol sa kwarta kang Tacio. “Salamat kaayo niini my love,” ni Tacio pa dayong kiss kang Joy.
“Hala, mangalit man og panghawok?” matud ni Joy nga nagngisi. “Pwede man usab og dili kaliton,” ni Tacio nga niining higayuna kalma na nga mihawok kang Joy. Nagpatara lang usab si Joy nga gihagkan. (Sumpayan)