"Tungod sa Uwan"

Mibunok ang kusug kaayo nga uwan niining buntaga. Naandan na nga ang amahan ni Lorelyn mao gayud ang mohatud kaniya sa iyang unibersidad nga nahimutang sa Natalio Bacalso Avenue. Apan tungod ba kaha sa kabugnaw sa panahon, wala moandar ang makina sa ilang kotse. Dili pa gayud unta molakaw’g sayo si Loloy kay alas otso pa man ang sulod nila sa opisina. Apan dili siya makabalibad sa hangyo sa iyang mga ginikanan. “Ikaw lang usa ang hatud sa imong manghod Loy kay unsaon dili man moandar ang makina sa akong sakyanan. Exam ra ba ron nila,” matud sa amahan.

Alas siete sa buntag ang first subject ni Lorelyn. Nagdali si Loloy nga naligo ug wala na lang gani mikaon sa iyang pamahaw aron dili mauwahi sa klase ang iyang manghod. “Salamat kuya ha? Wala gayud ko ma-late sa klase,” matud ni Lorelyn sa dayong kanaug sa kotse.

Superbisor si Loloy sa ilang kompaniya mao nga daku-daku ang iyang sweldo ug sa iyang paningkamot nakapalit siya’g segunda-mano nga sakyanan apan kondisyon pa kaayo.

Pagbiya ni Loloy sa tunghaan, mihinay na sa pagtuang ang kusug nga uwan. Nanggimok lang ang mga tinun-an nga nag-ilogay pagsulod sa tunghaan. Ang uban gihatud og mga kotse, samtang ang uban nanaug sa gisakyan nilang PUJ. Mipahinay si Loloy kay dunay mga tinun-an nga naglakaw sa daplin. Dunay mga libaong sa karsada nga dunay naglim-aw nga hugaw’ng tubig. Apan dunay sakyanan nga mikalit lang pag-overtake ug giligsan ra ang libaong. Misidlit ang hugaw nga tubig nga dunay dala nga lapok. Didto kini misablig sa samin sa kotse ni Loloy. Mihunong siya ug gilantaw ang sakyanan nga gimaneho sa tawo nga walay paghuna-huna sa sangpotanan sa iyang nahimo.

Gilingi ni Loloy ang mga tinun-an nga naglakaw sa daplin sa karsada. Diha pa niya masayri nga nagkabulingit tawon sa hugaw ang tulo ka tinun-an. Apan ang usa ka babaye maoy nagrabehan kay daku kaayo ang hugaw sa lapok nga diha sa luyong bahin sa iyang uniform. Giablihan ni Loloy ang samin sa iyang kotse. “Dia ko’y trapo miss,” matud ni Loloy apan tan-aw niya hugaw gayud kaayo ang uniporme sa babaye. Nanaug siya sa kotse. “Bastos kaayo to nga pagka drayber uy. Exam ra ba namo ron, unsaon na lang nako ani,” matud sa babaye nga daw kahilakon.

May nahuna-hunaan si Loloy. “Duna ko’y jacket naa sa kotse miss, akong pahuwaman nimo para dili makita ang hugaw sa imong uniform. Ayaw lang kaikog,” matud ni Loloy. (Sumpayan)