Kaklase sila si Beth ug Boy gikan pa sa pagtungha nila sa first year high school hangtud nga nahuman nila ang sekondarya. Ang ilang panagsuod maoy hinay-hinay nga mibugkus sa duha nila ka pagbati. Nagkarelasyon ang duha dihang nagtungha na sila sa unang ang-ang sa koliheyo.
Giswerte si Boy kay bisan sa kadaghan sa naninguha ni Beth, siya ang gitugyanan niini sa gugma sa babaye. Gitingub usab ni Boy ang iyang pagbati sa dalaga. Nagsinaaray sila nga dili gayud magbuwag ug magpakasal sila kun mahuman na sa pagtungha.
Suod na kaayo si Boy sa mga ginikanan ni Beth. Walay pagsupak ang mga ginikanan ni Beth nga si Boy maoy mapamana sa ilang bugtong anak. Nagkasuod na gani 'sab ang mga ginikanan ni Boy ug Beth. Ingon sa gipiyal na lang sa mga ginikanan ni Beth ang ilang anak ngadto kang Boy.
Kini maoy nakapalig-on pag-ayo sa ilang pagminahalay ni Boy ug Beth. Apan bisan pa niini, nakamaneho gayud si Beth sa paglikay sa mga tentasyon tali kanilang duha.
Apan usa ka higayon, giimbitar sila og night swimming agi og selebrasyon sa birthday sa ilang higala didto sa usa ka pribado nga beach sa Lapulapu.
Didto wala na gayud nila mapugngi pa ang ilang mga pagbati ug gianod sila sa kusog nga sulog sa tentasyon tungod sa kamadanihon sa palibot.
Nagpares-pares ang grupo ug nag-iyahay lang sa pagpangita'g dapit nga makaparayeg sila sa ilang mga minahal.
Sa tanto nga pagparayganay nila ni Boy ug Beth, daw giganoy sila paghinay-hinay ngadto sa kapunaw-punawan sa grabe nga kalalim sa ilang gibati.
Wala na makabalibad pa si Beth dihang gihangyo siya ni Boy nga dimdimon nila ang katam-is niadtong higayona. Ang ngilit niadtong gamay'ng pang-pang nga ilang gipasalipdan mao ray nakasaksi sa ilang kamalipayon. (Sumpayan)