Gula 5
Batasan gayud sa mga tindera nga kun dunay ilang customer nga gusto nga mosukod sa buot nila paliton nga sinena, ubanan nila kini didto sa nahimutangan sa fitting room. Didto ra sa gawas sa pultahan nagtindog si Vivian.
Taud-taud, mibukas ang pultahan sa fitting room ug migimaw ang lalaki nga customer ni Vivian. “Miss pwede ilisan nimo ni og large size kay mora’g huot ra,” matud sa customer. Gidawat ni Vivian ang T-shirt nga gitunol sa lalaki. Nakita ni Vivian ang balhiboon nga dughan sa lalaki.
Dali ra kaayo nga nakabalik si Vivian sa fitting room nga nagbitbit sa large size nga T-shirt basi sa giawhag kaniya sa customer. “Salamat kaayo miss ha?” matud sa lalaki nga midawat sa gitunol ni Vivian nga T-shirt.
Igo lang mipahiyom si Vivian ug sa makausa pa nakita niya ang balhiboon nga dughan sa lalaki. Takulahaw lang nga nakapapukaw kini sa pagbati ni Vivian. Dili sama niini ang dughan sa duha ka miagi niya nga boyfriend.
Migawas sa fitting room ang lalaki nga nagsul-ob gihapon kini sa T-shirt nga buot niyang paliton. “Pwede nga idiritso na lang nako og sul-ob miss ha?” matud sa lalaki. “Angayan ka man ‘sab kaayo sa T-shirt sir,” matud ni Vivian.
“Salamat miss, ila-ila diay ta, tawga lang ko og Bordz kay mao na’y tawag sa akong mga barkada apan Borde gayud ang akong ngalan,” nagpaila kang Vivian ang iyang customer. Gitug-anan usab ni Vivian sa iyang ngalan ang lalaki.
“Tulo kabuok ang akong kuhaon anang maong T-shirt miss, kolor yellow, green ug red,” matud ni Bordz. Pagbiya sa customer ni Vivian, gibinlan siya og calling card nga duna gayud tuo’y ngalan nga Atty. Borde Razon.
“Abogado diay to siya Vian? Dili kaayo mailhan no? Tan-aw nako mora’g naibog ra ba nimo mao nga gipalitan ka’g daghang T-shirt,” gikomedyahan si Vivian sa ilang superbisor.
Pagka hapon, dunay miabot nga messenger nga nagdeliver og buwak. Si Vivian ang gipadad-an ug gikan kini kang Bordz. (Sumpayan)