Dear Tita Salie,
Maayong adlaw ug kumosta? Usa ka panghinaot nga unta hayahay ang imong kahimtang karon. Bisan man kun lisud ang panginabuhian apan, hinaot lang wala’y dagkong problema nga imong giatubang.
Tawga lang ko sa pangalan nga Grace, 17 years old. Ang akong problema mahitungod kini sa akong lovelife. Unsaon medyo complicated lang siguro mao nga nahasol ko.
Duna koy hinigugma nga usa ka tomboy. Love kaayo nako siya, ug nasayod ko nga love pud ko niya. Apan dakong supak ang akong pamilya kaniya, Tita. Mao nga mangutana sila nako kun gikilatan ba kuno ko ug nganong mipatol ko sa sama nakong babaye. Matud nila kun unsay gipakaon nako sa tomboy nga na-inlove man ko niya.
Sa tinuod lang wala sab ko kasabot sa akong kaugalingon. Basta mingawon gyod ko sa tomboy kun dili nako siya makit-an. Usa ka tuig ug 4 na kabulan ang among relasyon. Ug bisan 1 minute lang siya nga dili nako makit-an mingawon na dayon ko niya. Naglibog gyud ko sa akong kaugalingon, Tita. Wala sab ko kasabot kun nganong ingon niini ang akong gibati ngadto kaniya. Wala nako kini tuyoa apan kalit lang gyod nga mitunga.
Palihug pasabta ko ug sultihi ko sa angay nakong buhaton. Daghang salamat sa imong pagtagad. God bless you always and more power. -- Grace
* * *
Hi Grace,
Maybe tungod sa attachment nimo sa mao nimong hinigugma maglisod ka sa pagpakigbulag kaniya. Tingali kun alagang-alaga ka gyod sa maong tomboy ug sa inyong pamilya dili ka ingon niana ka inatiman hinungdan nga duol kaayo ang imong loob kaniya. Basin kun daghan mo nga managsuon busa mabahin gyod ang attention sa inyong mga ginikanan diha kaninyo nga ilang mga anak mao nga nakulangan ka sa ilang pag-amoma ug diha sa tomboy nimo nakit-an ang imong gipangita nga pagpangga ug buhong ka diha kaniya kay masolo man nimo siya. Mao kini ang hinungdan kun nganong magpangita ka kaniya.
Kining mao nimong kinaiya nagtimaan lamang sa imong pagkabata pa kaayo og panghunahuna. You are only 17 years old, nagkinahanglan ka pa kaayo sa pag-atiman sa imong inahan, ug tingali buhong kaayo ka niini diha sa imong gikarelasyon. Tungod kay dili gyod kini mao ang gugma nga tinuoray ang imong gibati diha sa tomboy kay nasayod ka gyud nga dili siya ang tawo nga dapat nimong higugmaon hangtod sa kamatayon.
Of course, ang imong mga ginikanan supak gyod sa inyong relasyon tungod kay pareho ra man nimo ang imong gihigugma. Sila ang nakakita sa tinuod nga sitwasyon, ug ikaw nabutaan ka sa imong feelings ngadto sa tomboy. Ang kamingaw nimo kaniya mawagtang ra kana sa kadugayan. Himoang busy ang imong kaugalingon sa imong pagtuon aron dili ka kanunay maghandom sa imong uyab ug sa hinayhinay imo ra siyang makalimtan. -- Tita Salie