Gula 21
Kaganina pang nag-apong sa telepono si Mayor Mamerto Antigua. Naghulat siya sa tawag ni Max. Dihay kahinam nga mililo sa iyang kaisipan samtang nagpaabot sa tawag sa iyang sinugo. Misuyla ang maong kahinam samtang nalaygay ang pagpadangat sa taho nga magpahibalo kaniya sa katumanan sa gusto niyang mahitabo.
Mahinungdanon ang gisugo ni Mayor Antigua nila ni Max. Kun molampos ang iyang mga tawo, siya ang unang mabulahan. Naplansa na ang tanang kasabotan tali kanila ni Kee Lai Tong, usa ka langyaw’ng magpapatigayon nga maoy tag-iya sa KLT Group of Companies. Nakauyon siya sa kondisyon nga gitanyag kaniya sa negosyante.
Magtukod og pabrika sa semento si Kee Lai Tong sa ilang lungsod sa Awihaw. Gisang-at sa langyaw sa buhatan ni Mayor Antigua ang negosasyon. Nakita sa mayor nga makahatag og kabulahanan sa lungsod ang tumong sa langyaw mao nga misanong gilayon siya sa dakong pag-uyon. Dako kini’g ikaabuno sa kaban sa lungsod nga sayon ra unya niyang tangkoon. -- Sumpayan pa