Alas 4:00 sa kaadlawon, naghagok ug nagbukot pa sa habol ang mga tawo sulod ning mamingaw nga panahon. Bugnaw ang hoyohoy ug medyo nagtaligsik ang palibut ning mga taknaa. Taliwala sa katugnaw, misiak sa kamingaw ang tingog sa megaphone nga nag-awhag alang sa Santos nga Rosaryo sa kaadlawon.
“Santos nga Rosaryo..., rosaryo! Adto kita mag-abot sa kapilya Inse Biyay...! Lanog nga tawag pamukaw ni Mario uban kang Rudy sa mga debotos sa Kimba Dawn Rosary.
Ang kapilya Inse Biyay nahimutang daplin sa dalan saylo la’g diyutay sa karaang sementeryo sa Cansojong. Hilan kaayo ug halhag pa ang mga balay sa maong dapit. Si Mario nga nagsul-ob sa iyang jacket nagkuray sa katugnaw ug nangiyugpos sab si Rudy samtang nag-awhag sa mga debotos subay sa dalan probinsyal padulong sa kapilya Inse Biyay. Ang namatay nga Inse Biyay mao nagtukod ug gibangon ang iyang ngalan sa maong kapilya.
Didto sa unahan, nakita ni Mario ug Rudy ang babaye nga nagbitbit sa tikarol nga sagad gamiton nga suga sa Santos nga Rosaryo matag kaadlawon. Nagpurong kini sa itum nga bronda ug puti ang sinina. Taas ang buhok. Ang bayhon sama gyud kang Sister Toring nga mananabtan sa Santos nga Rosaryo. Paspas ang linaktan ni Mario ug Rudy nga buot moagpas sa naglakaw nga babaye.
“Paspas ‘Bay Rudy kay atong apson si Sister Toring...!” Matud pa ni Mario ngadto kang Rudy. Apan bisan pa sa paspas nilang linaktan, mora’g nagkakusog sab ang lakaw sa babaye. Unya, pag-abot gyud sa ganghaan sa sementeryo, ilang nakita nga miliko ang babaye ug misulod sa sementeryo. Nangangha ang duha ug nangurog ang lawas sa ilang nakita.
Way tingogtingog nga mipadayon sila paglakaw paingon sa kapilya. Sulod sa kapilya, ilang nabati ang tingog ni Sister Toring nga nag-una sa pangadye nga Angelus atubangan sa imahen sa Birhen sa Fatima. Misabat sab ang nanambong mga debotos sa Kimba Dawn Rosary ug human sa Angelus gikugos dayon ang imahen sa Birhen nga si Mama Mary kay ihatud sa laing sakop nga kapilya. Samtang naglakaw ang Santos nga Rosaryo, nangutana si Rudy kang Mario: “‘Bay, kinsa man kadtong misulod sa menteryo ganina...?”
Ambot, nia man si Sister Toring...!” Hagawhaw nga tubag ni Mario ngadto sa iyang abay Rudy. Hilum nga misunod sa Santos nga Rosaryo ang duha nga gisaug sa dakung pangutana: “Kins a man kadtong babaye nga miliko ug misulod sa sementeryo.....” (Katapusan)