Bigot og Lawas

Gula 2

 “Unsa nga oras g’yud nga mag-lunch ka Karen?” nangutana si Andro. “Dili magparehas kay usahay dili man gani ko mag-lunch para makadaginot ko,” matud sa dalaga.

“Uy dili kana maayo, mapasmo ka ana. Ang maayo no, magteksanay lang ta para magdungan ta pirmi sa lunch, ako’y bahala kay gusto ko nga dunay kauban kanunay sa pagkaon,” matud ni Andro.

Mipahiyom si Karen. “Mauwaw man ‘sab ta nimo ana. Luoy g’yud kaayo ko paminawon no? Unsaon estudyante pa man gud ko unya apiki ang akong budget nga ihatag nila ni Papa ug Mama.”

May misantop pagkalit sa huna-huna ni Andro. Gusto niya nga sakyan ang sitwasyon aron masuod kaayo niya si Karen. Human nila og kaon, gipangayoan niya’g cellphone number si Karen.

Wala magduha-duha paghatag si Karen sa iyang contact numbers. Gi-miss call kini ni Andro ug gi-save usab dayon ni Karen sa iyang phone book. “Sori ha kay usahay dili ko maka-reply kay walay load.”

Mingisi si Andro nga nakadungog. Gipindot-pindot niya ang iyang selpon, ug mitingog ang selpon sa dalaga. “Uy, hala? Imo ko nga gihatagan og load? Kadaku baya ani uy, one hundred man,” matud ni Karen nga pwerteng lipaya.

Nagbuwag sila pag-abut sa Agencia Kasaligan. Mibalik si Andro sa iyang opisina samtang si Karen mipaingon sa iyang tunghaan.

Pagka hapon na, giteksan ni Andro si Karen ug gipangutana unsa nga oras nga mahuman ang iyang klase. Wala danti’g dugay, mi-reply si Karen. “Seven o’clock.”

“Huwaton tika Karen sa gate sa tunghaan, dungan ta og dinner,” matud ni Andro sa iyang text.

“Cge, ok,” matud ni Karen nga abtik kaayo nga naka-reply. Wala tuod mosipyat si Andro kay diha gayud si Karen nagbarug gawas sa gate sa tunghaan. Gituyo ni Andro nga wala siya mosayo aron dili siya ang magpaabot.

“Tana, anha lang ta mangaon sa fast food store sa unahan,” matud ni Andro dungan sa paggunit sa wala nga kamot ni Karen. Sa ilang pagpangaon. “Kaswerte nako nga nakahimamat nimo Andro kay pirmi na lang ko nga nalibre nimo’g kaon,” ni Karen pa.

Gikuyogan ni Andro si Karen nga mag-atang og kasakyan. Gipakumkum ni Andro ang gipilo-pilo niya nga lima ka tag P100 nga papel de banko. “Uy hala, pagka thoughtful g’yud nimo Andro uy.”

Paraygon kaayo ang tinan-awan ni Karen ngadto kang Andro. (Sumpayan)