Lakip si Santino wala pa makaabot dinhi. Halayo man gud kini sa kinapusoran sa lungsod ug gikahadlokan ang gidungog nga bangis nga mga mananap nga nagpuyo sa maong lasang nga gituohang gibuhi sa mga engkanto.
Ang lasang sa Umakba nabaniog nga gipuy-an og banakon, usa ka matang sa bangis nga bitin nga kaliwat sa Anaconda. Dako og dili maluoy nga mokuniskunis sa tawo nga biktimahon ang maong mananap. Sumala sa sulti-sulti sa katawhan sa ilang lungsod, may nabiktima na ang maong mananap kapid-an na ka tuig ang nakalabay. Usa ka mag-uuma nga nagtikad sa yuta niini sa tiilan sa lasang ang gibugno sa banakon hangtod nga kini namatay. Sukad niadto, gilikayan na sa mga tawo ang pagtaak sa lasang sa Umakba tungod sa ilang kahadlok sa maong mananap. Gituohan nga misanay na ang mga bitin nga banakon sa maong lasang ug gihimo na kining sanktuwaryo sa ilang kaliwat.
Alang kang Maambong, talawan si Santino nga wala mosulay pagsum-ok sa lasang sa Umakba aron pagpangayam. Puti’g itlog! Bayot! Siya lang ang maisugong lalaki nga nakataak niining maong hilan nga dapit nga giisip niyang timbangan sa kaisog sa usa ka matuod nga lalaki. -- Sumpayan pa