Dihay kahasol nga milugmaw sa iyang mga mata ug mihunob sa iyang kahiladman, kahasol sa mga butang gikahinugnan sa pagbati kansang lintunganay ug kahulogan wala pa matugkad ug masinati sa hingpit. Dili niya makita ang pikas aping sa panahon kay ang iyang hunahuna ug kabubut-on gisanapan sa bul-og sa naghingapin nga kahakog ug huwabon nga tinguha.
Daan nang nagtanom og kayugot si Maambong ngadto kang Santino sa wala pa mahitabo kadtong panagsangka sa ilang team sa basketball kagahapon. Nakagamot na sa iyang kabubut-on ang pagdumot. Si Santino maoy hingpit niyang karibal sa gugma ni Dalisay. Kapin na sa usa ka tuig siyang nangulitawo sa dalaga. Apan si Dalisay idlas kaayo kaniya. Lahi kini sa ubang mga babaye nga kadali rang misakay sa iyang mga bulatik ug misayaw iyang palad. Wala siya makaugpo kang Dalisay.
Nagtuo siya nga may kinutoban ang lugway sa paglikay ni Dalisay kaniya ug sa kapulihay mokubit kini sa iyang paon. Apan mao na lang ang iyang kalagot sa dihang nasayran na niya nga gisugot na ni Dalisay si Santino kinsa dili pa lang dugay nga nanguyab sa dalaga. Nahisagmuyo siya pag-ayo. Miliskuhag ang iyang kabubut-on nga dili makadawat sa kapakyasan. -- Sumpayan pa