Gula 2
Nag-inusara lang si Maambong sa iyang pagtaak sa lasang. Wala niya pahibaloa ang iyang mga barkada nga mangayam siya karon sa lasang sa Umakba. Anad na siyang mangayam nga wala’y kauban. Maoy gusto niya nga magbinugtong sa pagpangayam kay dili kaayo matugaw ang mga langgam sa lasang. Niining higayona, siya’y protagonista sa sugilanong naumol sa iyang hunahuna sa binugtong nga panimpalad.
Segurado usab nga dili makakuyog kaniya sa pagpangayam ang iyang mga barkada. Nagtuo siya nga wala pa sila huwasi gikan sa kahubog tungod sa inom nilang wala’y tihiktihik kagabii. Nagbaha sa giokupar nilang lamesa ang ilimnong makahubog. Siya gani nagduogduog pa man ang ulo hangtod karon. Wala pa siya huwasi sa hingpit gikan sa kahubog. Sa iyang pamatyag, ang iyang kaugalingon mora pag gikan gilinog.
Kaadlawon na silang nahuman og inom. Miinat sa kagabhion ang ilang panaghudyaka uban ang iyang mga barkada nga kauban usab niya sa team sa basketbol nga Tribu Burukinto. Gihurot nila’g gasto sa alak ang nadawat nilang premyo isip first runner-up sa Parokya Paglaom nga maoy kampiyon sa torneyo nga gipahigayon kagahapon sa sentro sa lungsod sa Antuwanga nga nagsaulog sa tinuig nga pangilin sa patron nga gidebusyon sa mga lumolupyo sa maong lungsod.-- Sumpayan pa