Nibagting ang telepono sa lamesa ni Atty. Tony Ong dihang padulong na siyas gawas sa bupete aron motambong og bista. “Ong Law Office, Good morning” ni Tony dihang nibalik siya ug nipunit sa telepono. “Maayong buntag, Ton. Si Thelma ni. Naa unta koy ikunsulta nimo” sa pikas linya. Niaslum ang nawong ug nikunot ang agtang ni Tony.
Ig-agaw ni niyang nitawag. Apan wala gyud siyay kalipay kun kini nay motawag. Unsaon nga silang kaparentehan nga kaliwat sa Insek nga napoto (ang amahan ni Tony maguwang sa inahan ni Thelma) kay naabogado si Tony sa iyang kaugalingon paningkamot, daw gipasabot nila nga obligado siyang motabang sa mga paryente. Unya one-sided ang situwasyon. Kun si Tony nagkinahangla’g panabang, way ikatabang iyang mga ig-agaw.
Apo sila ni Doming Ong nga nabangkaruta tungod sa ka daghang babaye ug anak sa gawas. Ang amahan ni Tony nga nakahuman og kursos kolehiyo kay nagtinarong og eskuyla, giila sa inahan ni Thelma nga maoy nakabintaha kay nagastohan sa ilang apohan. Wa maghunahuna nga iya rang sala nga wa nakahuman og eskuyla kay hayskul pa nakigtaban na og laing kaliwat og Insek nga naputo. Karon, ang manag-agaw puro na arang-arang pagkabutang. Kay si Thelma may duha na ka anak nga tuas abroad nagtrabaho. Si Tony may duha na sab ka anak nga mga propesyonal.
Di gyud kaprangka si Tony sa iyang kahiubos sa ig-agaw. Unang namatay ang inahan ni Thelma nga si Tiya Lita ni Tony. Nibilar si Tony sa haya. Nilimos og dako. Nagdala’g daghang mga pagkaon. Pagkamatay sa papa Dencio ni Tony, nibilar tuod si Thelma. Apan wa gyud nilimos. Naghayon lang. Nanaway pas pagkaong gisirbi sa mga bisita. Daghan pa kaayo silang nanganha. Nag-imbitar og mga higala. Nga mora’g nitambong og birthday party. Pagkamatay sa Mama Nita ni Tony, mao gihapoy gibuhat sa pamilya ni Thelma. “Kining mamatyan ta, tabangan man unta! Pero unsa na man hinuon ni? Bisitahan ta’g paryente. Daghan kaayong maganayan. Daghang pakan-onon, serbihanan. Unya di pa gyud molimos bisa’g peso. Maayo pang silingan nga nakalimos. Kay mauwaw pa mokaon. Mahadlok ingnon ‘Limos og dos sentos. Kaon balig kinyentos” bagolbol ni Tony ngadtos iyang kapikas nga si Almira. Namid-ok na lang ang naulahi.
Kun mangunsulta si Thelma ug moanha gyud sa bupete ni Tony, mag-aganayan tibook pamilya. Naa ang mga anak, mga umagad ug mga pag-umangkon sa kapikas. Wholesale nga kunsulta. Unya mao pay magbuot sa presyo sa serbisyo sa abogado. Mohatag man tood. Kinasingkasing pa kuno. Apan labing dako, dos sentos pesos. Wa ras kahago sa pag-encode sa dokumento.
“Unsa may imong ikunsulta?” ni Tony nga gipugos og patarong iyang tingog aron di mahalata ang laing gibati. “Puwede ba makapahimo ta’g kontrata tali sa maid ug sa amo?” ni Thelma sa pikas linya. Nituyok ang kalimotaw ni Tony. Tataw gyud nga ngil-ad ni’g kinaiya iyang ig-agaw. Kay bisa’g maid lang, himoan pag kontrata. “Karon pa man ko kadungog ana. Nga maid ug amo, maghimo pa gyud og kasabutan. Pero puwede na. Aron mag-amping gyud ang maid sa iyang pagserbisyo” ni Tony. “Kuan man god. Daghan nang maid nako nga nigawas. Kasab-an lag gamay sa ilang sipyat, manglood dayon” ni Thelma.
“Anus-a man ka pahimo’g kasabutan?” ni Tony. “Mangutana una ko’g pilay imong pangayoong charges” ni Thelma. “Pila may suweldo sa maid?” ni Tony. “Tres mil pesos ang bulan” ni Thelma. “Balig usa ka bulang sweldo akong charges. Tres mil pesos sab” ni Tony. Niprangka sa iyang gustong singil, sa telepono. Daw nauknol ang sa pikas linya. “Mahal man diay imong singil, gaw” ni Thelma. Nanghupaw. “Aron kaseguro kang di mahal, ikunsulta una og laing abogado nga dili paryente. Kun pilay iyang pangayoon, katunga lay akong dawaton” ni Tony, dayong butang sa telepono. Kay ganiha ra siyang nagsisig tan-aw sa iyang relo de pulso. (Kataposan) (Sa magbabasang gusto’g libreng konsulta, dad-a ning pahina sa opisina sa tagsulat. Iatol og Sabado sa buntag)