Joy Riding

Gula 2

Nakahuna-huna si Lito nga i-deyt niya si Stella nga sila ra’ng duha. “Sugot ba mo nga manuroy mi si Stella nga kami ra? Hatagan ko lang kamo og tag five hundred pesos nga pamelete ninyo pauli, pero mangaon usa ta,” giingnan ni Lito ang duha ka kaubang teenagers ni Stella.

“Depende ni Stella

 kun mosugot,” matud sa usa ka dalagita nga maoy estoryador kaayo nga naglingkud sa luyo ni Lito. “Ikaw Stel, oky ra ba nimo nga makig-deyt ko nimo nga kita ra?” gisukna ni Lito ang gwapa nga dalaga sa iyang tupad.

Wala motingog si Stella ug alang kang Lito usa na kini ka tilimad-on nga walay pagsupak ang dalaga sa iyang sugyot nga manuroy. Gibunlot ni Lito ang cigaret box sa kotse ug gikuha ang tag-P500 nga papel de bangko.

“Hala kadaghan nimong kwarta Kuya uy,” matud niadtong naglingkud sa iyang luyo nga nakakita sa pagkuha ni Lito sa kwarta gikan sa cigaret box. Si Stella nakakita usab sa daghang kwarta ni Lito apan wala lang magtingog.

Gitunolan ni Lito og tagsa ka tag P500 ang duha ka dalagita nga naglingkod sa luyo sa lingkoranan sa kotse. “Unya na lang ang imo Stel kay special man ang para sa imo,” giingnan ni Lito ang dalaga nga diha sa iyang tupad sa kotse.

Nangaon sila sa usa ka barbecue stand daplin sa Legaspi Extention. Wala pa kaayo’y mga customers sanglit mao pa g’yuy pagkilum-kilum. Nakita ni Lito nga nalingaw kaayo ang magbarkada nga nangaon sa puso nga giparesan og barbecue.

“Ihatud na lang mi Kuya dapit sa Sanciangko kay para dili maibanan ang gihatag nimo nga tag P500,” matud niadtong tabian nga batan-on kang Lito. Misugot ra si Lito nga ihatud niya ang duha ka batan-on. Didto niya gi-drop ang mga batan-on atubangan sa Cebu City Medical Center (CCMC). Dayon gipadagan ni Lito ang sakyanan. “Asa diay ta karon paingon?” matud ni Stella.

Mag-night swimming ta sa Villa Teresita didto sa Barangay Biasong, Talisay. “Kita rang duha? Wala man koy senina,” ni Stella pa. “Walay problema na,” dali nga tubag ni Lito.

Agi sa SRP dali ra kaayo sila nga miabot sa Villa Teresita. Mikuha sila og usa ka air-conditioned room. Gipunit ni Lito ang intercom sa kwarto. “Miss, duna ba kamo’y mapalit o maabangan nga swim suit?” gipangutana ni Lito ang nagbantay sa counter.

Nalingaw sila pagtan-aw si Lito ug Stella sa daghang mga swimming pool nga lainlain ang giladmon. Dunay para bata ug dunay para dagko. (Sumpayan)