Gula 4
Misakay og taksi sila si Philipp ug Zeny uban sa laing duha ka babaye. "SM brod," giingnan ni Philipp ang taxi driver. Wala makauban kanila ang laing duha ka amiga ni Zeny kay gipangapoy.
Si Philipp ang milingkod sa front seat tupad sa drayber samtang si Zeny ug ang duha ka laing babaye didto molingkod sa luyo. Pag-abot nila sa SM, nagdali sila pagsulod sa mall kay bana-bana nila hapit na magsugod ang last full show.
Gituman g'yud ni Philipp kay siya ang mibayad sa pagtan-aw nila sa sine uban sa tulo ka babaye. Hapit na magsugod ang last full show, apan dili kaayo daghang tawo nga nanan-aw.
Didto sila milingkod sa sentro nga bahin dapit sa ibabaw. Ingon sa gihatagan og higayon sa duha ka babaye nga magkatupad sila si Zeny ug Philipp. Wala g'yud maglangan si Philipp, iyang gigunitan ang kamot sa call center agent samtang nagtan-aw sila sa salida.
"Mag-CR sa mi Zen," nananghid ang duha nila ka kaubang babaye. Nakalugar g'yud ang reporter nga si Philipp. "Duna ka na diay boyfriend Zeny?" gipangutana ni Philipp si Zeny.
Wala dayon motubag ang dalaga. Taud-taud mitubag kini paghinay "Duna pero wala kaayo ko'y gusto kay mora'g walay taym kanunay lang bisi. Gidala bitaw nako pagpangaligo sa dagat wala mouban."
Misantop sa huna-huna ni Philipp nga may porohan siya kun iyang panguyaban si Zeny. "Kun mao kana Zen, mora'g hayag ang akong kaugmaon kun manguyab ko nimo?"
"Ikaw ha, bilyako ka g'yud. Bag-o pa gani ta nagkaila manguyab ka dayon," matud ni Zeny. Nakapahiyom ang reporter samtang naghuna-huna siya og itubag kang Zeny.
"Ang ako ba nga kun magdugay-dugay ko basin og maunhan unya ko sa lain," ni Philipp. Mikalit sila kahilom kay nagsingabot ang duha ka babaye nga gikan sa CR. Apan didto na kini molingkod sa lingkoranan nga distansya kanila.
Nakabantay si Philipp nga gihatagan sila'g higayon sa duha ka babaye nga magkasultihanay nga sila ra si Zeny. Padayon nga gigunitan ug giduwa-duwaan ni Philipp ang kamot sa dalaga.
Gipasagdan ra usab ni Zeny ang reporter nga mipislit-pislit sa iyang wala nga kamot. "I love you," hagawhaw ni Philipp kang Zeny. Wala motubag ang dalaga apan mibawos kini pagpislit sa kamot sa reporter. (Sumpayan)