Gula 93
Nag-ingon ang polis nga nakatubag nga wala si Chief Inspector Yuri Cuyos wala moreport sa opisina. Gibutang na lang ni Salie ang telepono. Nganong wala man kini mosulod sa trabaho niini?
Dili ba kaha tungod sa hilabihang kahiubos ni Yuri kaniya mao nga wala kini motungha sa opisina? Nakonsensiya na hinuon siya karon.
Sa ikatulo nga adlaw mitawag na usab si Salie sa buhatan sa kapolisan. Nakapasalamat siya sa hilom nga diha na si Yuri. Nagkasulti sila.
Apan namatikdan sa dalaga nga uga ang pagpakigtubay sa ulitawo kaniya.
“N-nasuko ka ba nako, Yuri?” wala makapugong pagpangutana si Salie.
“Unsa ba kanang pangutanaha?” matud ni Yuri.
“Basin ba’g nasuko ka sa gibuhat ko kanimo?” ni Salie.
Wala motingog si Yuri didto sa pikas tumoy sa telepono.
“Yuri hinaot nga hisabtan mo ako,” matud na usab ni Salie sa mahuyo nga tingog. “Wala pa sa akong hunahuna kanang gugma-gugma. Dili pa ako andam sa pagkakaron alang nianang butanga. Nasayod ka na sa hinungdan. Dili lalim ang nahitabo sa among pamilya. Wala pa ako makadawat niini sa hingpit busa hangyoon ko ang imong pagsabot sa akong bahin.”
“Hisabtan ko ikaw, Salie,” matud ni Yuri. “Ang tawo nga nahigugma andam kanunay sa pagsabot sa binuhat nga iyang gihigugma. Ikaw hinuon ang wala makasabot kanako tungod kay wala mo man ako higugmaa.”
Wala makatingog si Salie.
“Apan dili nato kini hisgotan,” matud na usab ni Yuri,” kay tingalig mosangko na usab kini sa imong kasuko kanako. “Basta, ayaw lang kabalaka. Wala ako masuko o mahiubos kanimo.”
Wala gihapon motingog si Salie. -- Sumpayan pa