Gula 84
“Unsay okasyon?” Gipangutana ni Angeline si Robert.
“Selebrasyon lang agi’g pagrelaks human sa midterm exam,” tubag ni Robert. “Nagkasabot man gud mi sa mga klasmet nako sa PE nga human sa midterm mangaligo mi’s dagat. Nagtampotampo na man gani mi alang sa among probisyon.”
“Alegre diay mo kun mao kana.”
“Mas mosamot kaalegre kun mokuyog ka. Wa kay angay kabalak-an. Ipasalig ko nga di ka ma-out of place.”
Wala motingog si Angeline. Gitimbang-timbang niya ang gisulti ni Robert. Interesado siyang mokuyog sa maong outing apan nagduhaduha siya pagsanong sa pagdapit sa ulitawo kaniya.
“Aron di ka gyud bation og kalaay,” ni Robert pa. “Mahimong ikuyog nimo si Vera.”
“Sure ka?” Gisukna ni Angeline ang ulitawo.
“Yup!”
“Unya, pila may among itampo para sa atong bawon?”
“Ayaw na kana’g hunahunaa. Ako nay bahala niana. Ang importante nga mokuyog ka sa among grupo nga mangaligo sa dagat.” -- Sumpayan pa