Gula 67
“U-unsay ngano?” ni Salie nga ingon sa nahawan ang gibati pagkakita kang Allan nga migawas na sa kan-anan.
“Mora ka man gud og may gikahadlokan?”
“Gikahadlokan gud tatot.” Wala niya tug-ani si Yuri nga dili siya buot nga makit-an sila ni Allan.
Nanggawas sila sa kan-anan. Si Yuri wala na mosakay sa kotse ni Salie. Gikan sa Ayala nag-taxi na lang ang ulitawo paingon sa police headquarters. Ihatod unta siya sa dalaga apan mibalibad kini. Nausab ang hunahuna ni Salie imbes maglaroylaroy pa unta siya sa siyudad aron pagpanghagdaw og mga balita midiretso na siya sa iyang gipuy-an sa Mabolo.
Pag-abot niya sa balay gitawgan niya ang publikasyon. Si Vilma ang nakatubag. Nagpakisayod siya kun anaa ba si Allan. Si Vilma mitug-an kaniya nga si Allan milakaw dayon human kasultihi sa dalaga nga siya si Salie adunay gilakaw. Mikulismaot kuno ang nawong sa ulitawo pagkahibawo nga miadto siya sa police headquarters.
Human sa ilang panagsulti ni Vilma ang hunahuna ni Salie didto na kang Allan. Klaro na kaayo nga siya ang gipangita sa ulitawo didto sa Ayala Center kaganina. Lagmit miadto na kini sa kuwartel ug pagkasayod nga wala siya didto kay milakaw kauban ni Inspector Cuyos, maong gipangita siya niini sa mga malls sa dakbayan.
Nianang pagkagabii, si Salie naminaw sulod sa iyang lawak sa mga awit ug huning Binisaya nga gitugtog sa radyo. Nagpungko ang dalaga samtang nag-apong sa lamesa, dihang nadungog niya nga may sakyanan nga mihunong tungod sa ganghaan.
Midali siya paggawas human ikasuksok ang .45 kalibre sa iyang hawakan aron pagsusi kinsa ang nahiabot. Wala siya mokompiyansa kay tingali’g daotang tawo ang diha sa gawas. Nasayod siya nga daghan ang nasuko sa sama kaniya nga taga media, ilabi na kadtong mga tawo kansang mga hiwing binuhatan kanunay maigo sa iyang mga komentaryo. Daghan na ang iyang mga kauban sa propesyon nga gipamatay ug gipa-salvage mao nga kanunay siyang nagdala og armas. -- Sumpayan pa