Gula 5
Nalipay si Kenn kay nasabtan niya nga mitoo si Tina sa iyang kamatinud-anon. “Salamat Tina... unya sugton ba nimo ko karong gabhiona?”
Motubag na unta si Tina apan napakgang kay migawas sa pultahan si Valentin ug ang iyang asawa. “Dong Kenn, Tina... kamo lang usa dinhi sa balay kay may namatay nga among kumare sa pikas baryo nga among bilaran kadiyot.”
Walay suga-suga si Valentin ug ang iyang asawa nga milakaw taliwala sa kangitngit. Sa hilom, gikahinangop ni Kenn ang paglakaw sa mga ginikanan ni Tina kay sila na lang ang nahabilin sa balay.
Gigunitan ni Kenn ang kamot ni Tina. “Sugton na ba ko nimo Tina? Wala ka man kaha’y boyfriend mao nga dili ka magduha-duha sa pagdawat sa akong gugma kanimo.”
“Buyno, kay mianhi ka man g’yud sa among balay nga wala mahadlok bisan og gidungog kami nga pamilya sa ungo, nasabtan nako ang kamatinud-anon sa imong tinguha nako. Dawaton nako ang imong gugma,” ni Tina pa.
Pwerteng lipaya ni Kenn nga nakadungog. Gigakus dayon niya si Tina. Iya na unta kini nga hagkan apan wala kini madayon kay mitingog ang wakwak nga daw diha g’yud luyo sa balay.
Misamot nga migakus si Kenn kang Tina. “Unsa ron Tin? Wakwak ba g’yud ron? Wala ra ba dinhi ang imong Papa ug Mama.” Wala motingog si Tina ug igo lang mipahiyom.
Nasabtan ni Kenn nga wala mahadlok si Tina sa tingog nga ilang nadungog. “Ayaw kahadlok sa tingog nga imong nadungog Kenn, mahal man kaha ko nimo? Daghang gustong manguyab nako apan tungod sa giingong wakwak mahadlok sila, ikaw ra’y swerte nga wala g’yud mahadlok.”
Bisan og nagbutok-butok na ang dughan ni Kenn nga gisugdan na pagtuhop og kahadlok, apan gihagkan niya si Tina. Nag-ukobay ang ilang masi’g ka mga ngabil ug wala manumbaling sa tingog nga nagwakwak nga sa paniid ni Kenn anaa ra sa palibot sa balay.
Mikiat ang mga kamot ni Kenn. Gipanghiram niini ang kalawasan ni Tina nga maoy nakasugnib og talagsaong kainit sa tagsa-tagsa nila ka mga pagbati. Padayon ang ilang pagparayganay hangtud nga daw dili na nila kapugngan ang ilang gibati.
“Kanus-a kaha kadto mahibalik sila si Papa ug Mama nimo Tin?” gipangutana ni Kenn ang hinigugma. “Dugay pa tingali kadto kay maglakaw ra man sila ug layo ang pikas baryo,” ni Tina pa.
Nagkainit pa g’yud ang ilang pagparayganay. Panagsa na lang motingog si Tina nga daw gitagamtam ang katam-is sa gugma. (Sumpayan)