CEBU, Philippines - Kaming mga silingan, kun mag-utan, ug kapoyon nang moadto sa Taboan, mamalit na lang og mga lamas sa silingan nga namaligya og mga lamas.
Usahay, mangutana na lang sa laing silingan, kinsay duna sa lamas nga gikinahanglan.
Apan ang dili mapalit o mapangayo, mao ang kamunggay. Kay ang kamunggay wa na man gyo’y lami kun lawos na, o bahaw na.
Busa, asa man mi mangita sa kamunggay nga lab-as nga dili na kinahanglang moadto sa taboan? Adto na lang mi sa ilang Ingrid.
“Pangayo’g kamunggay sa ka Ingrid..” Mao ra kana’y kasulbaran sa problema kun wa mi kamunggay kun mag-utan [monggos o sari sari]. Nailado na si Ingrid sa iyang kamunggay. Kay daghang punoan ug labong kaayo.
Kaming mga silingan, misulay sa pagpananom og kamunggay. Apan dili gyod mabuhi. Ang uban nga dili suod ni Ingrid, ug mauwaw mangayo, moadto gyod sa taboan.
Kinsa si Ingrid? Ingrid Rama Gocela, asawa ni Engr. Bernard Gocela, ilado nga award winning composer. Sama kang Ingrid, dili usab modawat sa bayad sa ilang kamunggay.
Suod si Ingrid sa banay sa mga Rama. Sama sa ubang mga Rama, kalma, bisan pa’g binoangan. Sila si Jude [nag-alagad sa Palace of Justice], Douglas [practicing architect], Laksmih Rama Apana [adunay Home For The Aged sa Canada], ug Sharla Rama Soco [tua usab sa Canada], mao ang mga igsoon ni Ingrid. Early retirement ang gipahimudsan ni Ingrid, isip nutritionist sa City Health.