Dear Tita Salie,
Tawga lang ko sa pangalan nga Lito, security guard sa usa ka banko. Usa ka ulitawo apan nahilambigit sa usa ka babayeng minyo nga nagtrabaho ra usab sa banko nga akong gibantayan.
Namugna ang among gitagong relasyon tungod lang kay ako man ang kanunay niyang sugoon para mopalit og sud-an para sa iyang lunch. Ibilin ra niya ang kuwarta diri kanako sa dili pa siya molingkod sa iyang opisina. Ug ako ra ang iyang papilion sa sud-an nga iyang kan-on, kay matud niya iyang kan-on bisan unsang akong maayonan nga paliton.
Nagkarelasyon gayod kami kay iya man kong huwaton inig out niya inigkahapon. Apan dunay panultihon nga wala’y asong makumkom, busa nahibaw-an kini sa uban niyang mga kauban sa trabaho. Busa ako siyang gisultian bahin niini kay nahadlok ko nga mabulgar ug basin mabungkag ang iyang pamilya. Apan miingon ra man siya nga pasagdi lang sila nga masayod, ug igo ra ko manimawos sa akong bana. Unsa may akong buhaton, Tita? Salamat. -- Lito
* * *
Maayong adlaw kanimo, Lito ug kumosta? Sakto ang imong gibuhat nga imo siyang gisultihan sa posible unyang mahitabo kay basin og pulos gayod kalagot ang iyang nabatyagan ug mao na lamang ang iyang pangandoy ang makabawos sa iyang bana. Tingali og nabutaan ang iyang mga mata ug wala siya’y laing mahunahuna nga sangputanan sa iyang mga gipangbuhat tungod sa kasuko.
Busa ayaw gayod padala sa iyang gibati nga kasuko sa iyang bana kay sigurado gayod nga maapil ka sa ilang away ug usa ka sa makaluluoy. Wala ka masayod sa buhaton sa iyang bana kun iya kining masayran nga nagluib ang iyang asawa. Namiligro ang imong kinabuhi ug dili usab maayo nga pareha ra mo og gitrabahoan. Basin unya matangtang ka sa imong trabaho.
Busa tabangi ug giyahi siya ug pasabta siya nga dili maayo kun inyong ipadayon ang inyong gitago nga relasyon. Kay moabot ra gayod ang panahon nga kini masayran o mabutyag sa kadaghanan luoy ang iyang pamilya nga mabungkag ug daghan ang mga tawong maapektohan ug masakitan.-- Tita Salie