Gula 13
Gikinahanglan nato kanunay ang bag-ong gimik, Miss Valle,” nagkanayon ang editor. “Tingalig dili magdugay ang sirkulasyon sa atong mantalaan kun ingon niana ang mga estorya nga imong ihatag kanako.”
“Unsa ba gayod diay’ng matanga sa estorya ang imong gipangita?” nataas ang tingog ni Salie nga niabot sa kapikal.
“Kanang balita nga makatagad sa mga magbabasa ug ilang sundan hangtod sa pagkahuman,” untop nga tubag sa editor.
“Nganong dili man hinuon kita magbuhat og komiks?” kanang dunay mga sugilanon nga pagasumpayan o padayonon?” ni Salie.
Mikunot ang agtang sa lagas. Ingon sa wala kini magdahom nga mao kadtoy masulti ni Salie. Mihait ang iyang tinan-awan sa dalaga. “Miss Valle, wa koy labot kun supak ka man sa akong gisulti. Basta mao kanay atong editorial standards dinhi. Ug kun gusto kang magdugay niining maong field sunda ang akong gisulti,” inggit ang tingog sa editor.
Sa nakita nga nagkainit ang ilang panaglalis, si Allan dihadiha mibaraw sa duha.“Sir, kalma lang. Ikaw na lay mosabot kang Miss Valle. Sayod ka bitaw sa iyang batasan.”
Gilimuokan ni Salie ang ulitawo apan wala kini tagda sa lalaki. Si Mr. Suarez wala motingog nga igo lang mitan-aw kang Allan. Nasabtan niya ang ulitawo.
Mitindog si Salie-mug-ot kaayo ang nawong nga mipunit sa iyang manuskrito nga gisalikway sa editor. “Hatagan ko ikaw sa estorya nga imong gipangita, Mr. Suarez. Kanang sugilanon nga makapatagbaw kanimo ug makapakusog sa halin sa Moon-Star Daily.”
“Buhata kana, Miss Valle. Dili kay kutob lang sa estorya.”
“Huh! Adto na ko, Sir!” nanamilit ang dalaga.
“Sige,” matud sa lagas nga tugob sa kamasinaboton. -- Sumpayan pa