Classmate

Gula 4

Paghiuli ni Oscar didto sa balay sa iyang apohan, dugay siya nga nakatulog. Maoy diha sa iyang huna-huna ang panagway ni Joy. Dili siya makatoo nga ingon na niini kaanyag ang iyang classmate sa elementarya.

Dose-anyos pa sila dihang wala na gayud sila magkita kay dinhi na man sila manimuyo ug ang iyang mga ginikanan sa ciudad sa Sugbo. Dunay mga higayon nga mobisita sila sa probinsya apan sulod lang sa pipila ka adlaw ug wala na sila magkita.

Nakapanglingo-lingo si Oscar nga naghuna-huna sa iyang kabuang kaniadto dihang gibuksan niya ang sayal nga gisul-ob ni Joy. Wala siya malimot nga mihilak pag-ayo niadto ang iyang classmate ug wala na gayud motagad kaniya hangtud nga nahuman ang ilang klase. Taud-taud, giganoy si Oscar sa katulogon. "Dili ko modawat sa imong gugma Oscar. Bugal-bugalon ka nga pagkatawo. Sori kaayo. Pauli na kay moabot na karon ang akong admirer."

Wala kapugngi ni Oscar ang paghilak. Wala niya ikauwaw ang pagbakho atubangan ni Joy nga igo lang mipahiyom nga nakakita kaniya nga mihilak. May miabot nga lalaki ug gigakus kini ni Joy.

Midagan si Oscar nga wala makaantos sa iyang nakita. Sa tanto niya nga pagdali-dali nahulog siya sa hagdanan. "Ahhhh!!!!.." Ahhhh!!!"

"Gaw, gaw! Pagmata kay nagdamgo ka," gipukaw si Oscar sa iyang ig-agaw nga gikatupad niya sa paghigda. "Gaw, nagdamgo ra diay ko," matud ni Oscar nga nagpamahid sa iyang mga luha.

Wala na siya makatulog pa. Nagsultihanay na lang siya ug ang iyang ig-agaw. Iya kining gisaysayan sa iyang damgo.

"Mora'g dulot g'yud tingali sa bukog ang kaibog nimo ni Joy gaw da," matud sa usa ka ig-agaw ni Oscar.

Pagka buntag na, sayo kaayo nga nagdungan pagpangaligo ang mag-agaw didto sa tubod nga maoy kab-anan og tubig sa mga lumolupyo sa ilang sityo. Wala tuyoa nga nagkatagbo sila si Joy nga nagkabo usab og tubig.

"Joy, makadaug ka'g alsa nianang container nga puno sa tubig?" daw dili makatuo si Oscar nga mohimo si Joy sa pagpas-an sa usa ka container nga tubig. "Ako nay modala sa tubig Joy… ako'y motrabaho sa imong gimbuhaton nga bug-at," ni Oscar pa ngadto sa dalaga. Wala gayud magpabalibad si Oscar kang Joy nga miinsister g'yud unta nga siya ra ang mopas-an sa tubig.

Gibati og kalooy si Oscar sa dalaga. "Ako man gud ang tighakut og tubig sa among balay Oscar. Naanad na ko ani kay pobre man," pasabot ni Joy. (Sumpayan)