Gula 84
“Unsay atong buhaton, Boss?” Miduol si Kirat kaniya. “Armado diay usab kanang lalaki nga kauban ni Danica. Ang pugante tingali kanang tawhana.”
“Paghilom diha!” Gibadlong ni Randy si Kirat. “Tago hinuon kay basin og maigo kanang bagulbagol mong nagsinaw.”
Nahilom si Kirat.
“Danica,” singgit ni Randy. “Si Randy kini. Nia ko aron pagkuha nimo. Dili mahimong imo kong layasan kay naandam na ang tanan alang sa atong kasal.”
Wala’y tubag gikan sa sulod sa payag.
Naproblema sila si Randy kay dili sila makapaduol sa payag. Sa higayon nga mosulay sila’g paduol, pabuthan gilayon sila. Upat na ka mga sakop ni Randy ang napatay.
Gimandoan ni Randy ang usa sa iyang mga sakop nga moatake sa sulod sa payag. “Amo kang koberan.”
Pero mibalibad ang iyang gisugo, klarong nahadlok. “Sharp shooter kaayo ang naa sa sulod, Boss. Seguradong TKO ko kun mangahas gyud ko.”
Nakapangusmo sa kalagot si Randy. Iyang gikablit ang gatilyo sa gigunitan niyang Uzi. Apan didto niya gitumong sa langit ang iyang pagpabuto. Dili mahimong rakrakan niya ang payag kay dili siya buot nga mapagan si Danica. -- Sumpayan pa