“Way bale. Ang importante mao nga mag-amping lang gayod kita kanunay.”
Tungod kay sila na man gayong duha ang miadto sa lungsod, gipahimuslan na lang ni Jeffrey ang pagpalit og daghang bugas, mga delata ug ubang mga pagkaon kutob sa magakan nila pagdala. Gituyo niya kini aron dili sila magpunay og balik-balik sa lungsod.
Upat ka plastic bag ang dalang kinompra ni Jeffrey. Duha usab ka plastic bag ang gibitbit ni Danica. Dili hinuon kaayo bug-at ang dala ni Danica tungod kay mga gaan nga items ang sulod sa maong mga plastic bags. Ang mga bug-at nga items maoy gisulod didto sa plastic bags nga gibitbit ni Jeffrey.
Paggawas nila sa Gaisano Carcar diin didto sila nag-grocery, nangita dayon sila‘g habal-habal nga kasakyan paingon ngadto sa bukid nga ilang gitagoan. Apan wala na nila palahosa ang habalhabal ngadto sa may simangan paingon sa bukid. Diha ra nila kini pahunonga unahan og diyotay sa kabalayan sa kataposang barangay nga ilang nalabyan.
“Nganong dinhi ra man ta kutob nagpahatod?” Sukit ni Danica. ‘Layo pa man tong simangan paingon sa bukid nga atong gitagoan.” -- Sumpayan pa