Samtang naghigda nga natulog si Danica, wala kalikayi ni Jeffrey ang pagtutok sa panagway sa dalaga. Bisan kuwap ang kahayag sa lamparilya apan maaninag pa gihapon niya ang kaanyag niini. Oo, matahom si Danica. Mas matahom pa gani kini sa kanhi niyang hinigugma nga si Gemma.
Nabatyagan ni Jeffrey ang kakulba nga milubok sa iyang dughan samtang nagpadayon siya sa pagtutok sa matahom nga panagway ni Danica nga nahinanok na. Kakulba nga ingon sa nakapasayaw sa iyang kasingkasing. Nabuhian ni Jeffrey ang usa ka lawom nga panghupaw. Unya milingolingo siya.
Mihinay pagtindog si Jeffrey ug mipaingon dapit sa may pultahan. Didto mihigda siya nga nag-unlan sa kaugalingon niyang bukton. Gipiyong niya ang iyang mga mata. Buot niya nga makatulog sa maong kahimtang.
Taas na ang gintang sa adlaw didto sa sidlakan sa pagmata ni Danica. Gipaliraw niya ang iyang mga mata sa sulod sa payag. Wala si Jeffrey.
Mihinay siya pagbangon ug migawas sa payag. Wala gihapon niya makita si Jeffrey didto sa tugkaran sa payag. Nasayod siyang kaganina rang nagmata ang ulitawo. Nakaluto na kini sa ilang pamahaw. -- Sumpayan pa