Paglabay sa pipila ka daklit, nananghid na siya kang Pasyo. Mopauli na siya. Gihatod siya niini hangtod sa tugkaran sa balay. Nabatyagan niya nga wala’y kausaban ang kinaiya ni Pasyo. Usa lang gyud ang nausab – si Deling!
Sa nakabiya na siya sa pinuy-anan sa iyang kompare, ang tanyag niini nagpamilit pa sa kawili sa iyang hunahuna. Pero dili mahimong ipamugos niya ang iyang kaugalingon. Dili makatugot ang iyang tanlag nga may kabubut-on nga masilo luyo sa iyang pagpahimulos sa kahigayonang gitanyag kaniya ni Pasyo.
Samtang nagpadayon siya paglakaw, nalantawan niya si Deling uban ang mga anak niini. Midali kini pagsulod sa usa ka balay pagkakita kaniya. Kaha dili gustong makakita kaniya. Wala na niya kini hatagi’g pagtagad. Mipaturatoy siya paglakaw. Sa batong batilis sa iyang hunahuna dihay panumpa nga gikulit. Dili na gayod siya mobalik sa maong dapit!
Wala si Lucia sa iyang paghiabot sa ilang pinuy-anan. Ang kahilom maoy miabiabi kaniya sa iyang pagsulod sa balay. Nahibulong siya. Wala man magpabitikbitik ang iyang asawa sa dayon niyang lakaw kaganina nga may lakton usab kini. Misugod siya’g sukot sa iyang kaugalingon kun hain ang iyang asawa. Apan wala siya’y nahikap nga tubag sa iyang pangutana. Mihukom na lang siya nga magpaabot kun kanus-a mahiuli si Lucia.
Miira’g siya sa butaka nga gipahimutang sa kabos nilang sala. Mao pa gani paghiunlod sa iyang kaugalingon sa lingkoranan, dihay nahiabot, si Lucia. Kauban niini ang bugtong nilang anak nga nagkabiba sa bag nga gisudlan sa mga gamit niini sa eskuylahan.
Ang bata wala magtingog. Midiretso sulod sa suwambi. Wala gani moamen kaniya. Namatikdan niyang naglamugdong ang dagway sa bata. May kahibulong nga mihakop kaniya. Pero wala na siya makahigayon pagtuki kun unsay nahitabo sa ilang anak. Naunhan siya pagpangutana ni Lucia.
“Kaganina ka ra bang nahiuli?” sa asawa pa.
“Dili pa lang gyud dugay,” niya pa. “Diin ka man diay?”
“Didto ko sa eskuylahan,” maoy tubag. “Gipatawag ko ni Ms. Punzalan, ang maestra ni Dodong.”
“Sa unsang hinungdan?” nabitik ang iyang kaikag sa pagpakitubod. -- Sumpayan pa