Natukas ang palid sa pultahan. Mibantang sa iyang panan-aw ang bayhon sa usa ka lalaki nga puti og pamiste. Nagtakin kini og armas sa hawakan. Iya kining gipakigsultihan. Iyang gisayran sa iyang katuyoan.
Gikab-ot sa guwardiya ang telepono sa duol niini. Midayal og pipila ka numero. Wala madugay, diha kini gikahinabi sa awditibo si Mr. See ang gikasulti sa sikyu. Misantop sa iyang hunahuna nga ang maong tawo maoy tag-iya sa pabrika. Nabati niya nga siya ang ilang gipanagsultihan.
Human sa hamubong panagsulti sa telepono, siya nay giatubang sa sikyu. “Palahoson ka kuno sa iyang opisina,” nagkanayon ang guwardiya. Gitudloan siya sa guwardiya kun hain mahimutang ang buhatan ni Mr. See. Gisubay niya ang giya nga gidetalye sa sikyu kaniya.
Natukmaan niya ang usa ka seradong pultahan. Ang karatola nga gipatapot sa palid niini nagtug-an nga mao na kini ang buhatan ni Mr. See. Mituktok siya’g makatulo. Dayon gihinay niya’g tukmod ang sera sa pultahan. Milili siya ngadto sa sulod.
“Come in,” agda sa lalaki nga nag-irog sa swivel chair nga nakamatikod sa pag-igot sa pultahan.
Mihinay siya pagsulod. Gitagbo siya sa kabugnaw sa aircon. Ang lalaki nga sa iyang banabana dul-an na sa kan-uman ang pangidaron -- wala mohayat kaniya. Ang pagtagad niini didto ra sa mga papeles nga gipirmahan niini. “M-maayong buntag,” may kataha nga mikumpayot sa iyang tingog. “Lingkod,” awhag ni Mr. See.
Mihinay siya pagpahimutang sa silya atubangan sa lamesa ni Mr. See. Ang duha niya ka kamot gipatong sa iyang mga paa. Sa iyang handurawan mililas ang pasundayag sa sakayan nga naabtan og unos sa taliwala sa lawod.
“Unsay tuyo?” may kapintok ang pangutana sa lalaking Insekon og mata nga miatubang na kaniya.
“M-moaplay unta ko pagka-kargador, Sir,” gituya sa kakulba ang iyang tubag. “May kasinatian ka na ba sa maong trabaho?” Laing pangutana gipasupot sa Insek nga larino nang mosulti’g binisaya.
“Wala pa hinuon,” gitug-an niya ang tinuod. “Pero anad ko sa bug-at nga trabaho.”
Miyanguyango ang Insek. Ang tuo niining kamot nagduladula sa gigunitan nga bolpen. -- Sumpayan pa