Gula 43
Nadiskubrehan ni Jeffrey nga ang lungsod sa Carcar mao diay ang labing duol sa dapit nga ilang gitagoan. Apan may gilay-on nga dul-an sa napulo ka kilometro ang gilay-on sa maong dapit sukad sa kinapusoran sa lungsod sa Carcar sa banabana ni Jeffrey.
Nagmabinantayon kanunay si Jeffrey sa didto na siya sa lungsod. Giigmat niya ang iyang mga mata kay tingalig adunay makaila kaniya. Mipalit siya’g kalo ug sunglasses. Iya kining gisul-ob aron pagseguro nga dili siya daling mailhan.
Namalit si Jeffrey sa tanang kinahanglanon nila ni Danica sa pagpuyo sa bukid. Gipalitan usab niya’g pipila ka paresan sa sinina ug underwear si Danica. Nasayod siyang tapot-lawas lang ang dalaga tungod kay ang bag nga gisudlan sa mga sinina niini nahibilin man sa bus sa dihang iya kining gi-hostage.
Wala magdugay si Jeffrey sa lungsod. Human makapamalit sa ilang gikinahanglan, mipalit siya’g usa ka kopya sa Banat News ug dayon midiretso na ngadto sa paradahan sa mga habal-habal aron mobalik na ngadto sa dapit nga gitagoan nila ni Danica.
Nakugang si Danica pagkakita sa daghang pinalit ni Jeffrey. Ang mga pinalit niini gisulod sa upat ka dagkong plastic bag.
“Imo ni,” gitunol ni Jeffrey ngadto kaniya ang usa ka plastic bag.” -- Sumpayan pa