Gula 37
Wala motubay si Danica sa gisulti ni Jeffrey.
“Mabuhi diay ta dinhing dapita kay duna may tubig,” ni Jeffrey pa. “May mainom kita, makaluto ug makaligo.”
“Maayo hinuon. May nasusihan man sab ko diri sa usa ka suok ning payag.”
“Unsa man?”
“Kaldero. Natabonan kini sa mga sakong gisi. Nasusihan ko kini kaganina kay ako mang gilimpiyohan ang sulod sa payag.”
Milili si Jeffrey sa sulod sa payag, kaha aron pagsuta kun tinuod ba ang iyang gisulti nga gilimpiyohan niya ang sulod sa payag.
“Magamit nato ang giingon mong kaldero sa pagluto sa atong pagkaon,” ni Jeffrey pa.
“Oo,” ni Danica. “Limpiyohanan pa hinuon kadto. Pero asa man sab ta’g lutoon nga wa man tay bugas?”
“Ugma molugsong ko sa patag aron mamalit sa atong mga kinahanglanon dinhi.”
Nanihapon sila nga tinapay ray gipares sa inasal nga manok ihalas.
“Maayo gani kay daghan ang gipalit nimong pan,” nagkanayon si Danica samtang nangaon sila.
“Nagreserba ko’g daghan,” ni Jeffrey pa. “Wala man guy klarong direksiyon kadtong akong pagbiyahe.”
“Asa man unta ka paingon kun wala ka pa masakpi sa mga polis nga naghimo’g checkpoint.” -- Sumpayan pa