“Val, unsaon ta na man lang ini, nga mouli na ra ba ang akong bana nga tua sa Dubai.”
“Dugay pa man kaha to mouli, Lor?”
“Sa sunod bulan.”
“Ambot lang ini, Lor, oy kun nganong nagkaila pa man ta. Maayo pa man hinuon tong wa pa ta magkaila, kay magsige lang ta og tinan-away sa usa’g usa. Karon problema na nuon.”
“Giliw ko,” may nagpatugtog sa jokebox, “nang tayo’y magka kilala, puso koy di na malaya. Mahal kita ngunit ‘yan ay kasal-anan, pagkat ako’y di na malaya sa pagmamahal.”
“Magtaban na lang nuon ta Val.”
“Ayaw oy!”
“Ngano man, ulitawo pa man kaha ka?”
“Oo, pero luoy man gud ang imong duha ka anak, kung imong biyaan,” pamakak ni Val, sanglit minyo man sab siya apan wala masayod niini si Lormel.
“Limotin mo ako, o aking hirang,” padayon ang awit sa jokebox,” upang kapwa tayo’y di magkasala. Bakit ba, ngayon lang kita natagpuan, ngayong ako ay di na malaya sa pagmamahal.”
“Lor, kini ang kanunay mong timan-an nga bisan di na ta magkita, gimahal ko gihapon ikaw. Og kun kita alang gayud sa usa’g usa, magkatagbo lang gihapon ta.”
“Unsa may buot nimong ipasabot, Val, nga magkalagyo na ta?”
“Mo-distansiya una ko Lor kay hapit na man kaha moabot ang imong bana.”
“Pero nia ka lang gihapon dinhi sa Manila?”
“Mouli una ko sa ato, sa Cebu ug kun mobalik na sa Dubai ang imong bana, mobalik usab ko dinhi.”
“Hatagi nuon ko sa imong cel.”
“Ayaw! Basta mobutho lang ko dinhi.”
Dugay na kadto. Kapin na tingali sa usa ka tuig apan kanunay ko gihapon nga gipangandoy ang iyang mga halok ug gakos. Apan gipugngan ko ang akong kaugalingon nga dili na makabuhat sa ingon. Akong gisugilon sa akong asawa ang among relasyon ni Lormel ug igo lang nga nagpatulo sa iyang mga luha nga nagkanayon. “Diin man ako magkulang nimo, Val?”
Sama sa gikumot ang akong kasingkasing sa kaluoy sa akong asawa, busa ako siyang gitubag. “Kadto na ang kataposan kong paghisalaag, Linda. Dili ko ikaw ibaylo ni bisan kinsa.”
“Iya akong gigakos nga namulong. “Gituohan ko ikaw, Val, gituohan ko ikaw.”
Nakahukom ako. “Usa na lang kadto ka kaagi sa usa ka awit.’ (Kataposan)