“Sus, paita ning mag-inusara na lang ta sa kalibutan wala gyuy anak o apo ba hinuon nga masugo-sugo nato ilabi na gyud nga aduna kita’y balatian nga giantos”, nagkanayon si Binyang sa hilom usa ka sayong kabuntagon samtang gipugos niya ang iyang lawas sa pagdigamo alang sa iyang pamahaw uban sa usa ka buok iring ug iro nga maoy silbing kauban niya ning nahabiling mga adlaw sa iyang kinabuhi.
May igsoon unta siyang babaye apan namatay kini sa tipdas samtang gamay pa. Ug si tatay Panyong ug nanay Asyang niya nagsunod lang og pangamatay gumikan sa ilaha nang pangidaron duha ka tuig na ang milabay.
“Binyang, sugta na intawon ko og ayaw nako’g paantusa kay kun dawaton mo ang akong gugma pakaslan gyud tika ug paningkamotan ko bisan pordoy ang among kaliwat magmalipayon kita sa atong panag-uban,” nanumbalay sa panumdoman ni Binyang ang mga pulong ni Amboy nga nangulitawo niya samtang bag-o pang buklad ang mga gihay sa iyang pagkadalaga.
Wala niya sugta si Amboy kay hilabihan sab ka pordoy ang mga kaliwat niini. Himilian ug sobra ra ka ambisyosa kini si Binyang. Daghang kaulitawhan kaniadto ang gustong maniba ug modimdim sa katam-is sa dugos ni Binyang.
Gawas ni Amboy, diha pa toy Goryo, Sabas, Felis, Simeon, Bosyong ug Pitong nga kiriwan og manok. Silang tanan pulos gibalibaran ug giayran ni Binyang ang ilang mga gugmahanong katuyoan.
Estrikta ug hinawayon si Binyang sa mga apan ug kakulian sa iyang isigkaingon.
Karon, sa tantong pagkahimilian ug pagkaestrikta napuntarya na hinoon siya sa wala na gyuy mipunit og misapupo kaniya hangtod nagpangidaron na karon siya og saysenta kapin ka tuig.
Gawas sa iyang pangidaron, may giantos usab si Binyang nga hubak, paningot ug liponglipong sa kalawasan.
Luya na usab ang iyang mga lutahan ug kaunoran sa iyang mga tuhod gumikan lagi sa nagkataas na niyang pangidaron. Wa siya’y anak o apo na ba lang nga makatabang ug makaagak kaniya kay nahibilin man siya nga usa ka dalagang guwang gumikan sa pagkadili niya maayo og batasan ug sa iyang pagkamaut samtang batan-on pa siya kaniadto.
“Ulahi gyud diay ang pagbasul,” nakatuaw si Binyang ug mitulo ang iyang mga luha samtang naghungit siya sa iyang pamahaw nga giparisan og inun-onang bolinaw diha sa iyang kulon.
Busa, mintras bata-bata pa ang atong pangidaron angayan gyud natong planohon ugma damlag nga dili kita magmahay sa kalibotan sa kaulahian sama kang Binyang ning atong sugilanon. (Katapusan)