Hangtod ba karon, Jackie, dili ka pa gihapon makatubag mahitungod sa akong proposition?” Sukit ni Flip usa ka higayon niana sa ilang panagsulti sa sala sa townhouse nga iyang gipuy-an. “Dugay-dugay na kong nagpaabot.”
Wala motingog si Jackie. Naghinuktok siya. Iyang gitugkad sa iyang kaugalingon kun may pagbati ba siya alang kang Flip. Iyang gisuta kun nahigugma ba usab siya ngadto niini.
Alang kang Jackie, usa ka perfect gentleman si Flip. Dili kini lisod higugmaon. Gani nasuta na man niya sa iyang kaugalingon nga may pagbati na siya alang niini. Inanay na siyang nakagusto kang Flip.
Apan deep inside, si Ethan pa gihapon ang gipangandoy sa iyang kasingkasing. But much to her dismay, wala siya hatagi’g pagtagad ni Ethan bisan nagpaka-flirt na siya aron makuha ang atensiyon niini.
Karon iyang nakita nga si Flip maoy makapuno sa kahaw-ang nga gimugna ni Ethan sa iyang kasingkasing.
“Dawaton ko ang imong gugma, Flip,” ni Jackie pa, “apan ubos sa usa ka kondisyon.”
“Unsa nga kondisyon?” Sukit ni Flip.
“Kun mahimo ililong una nato sa publiko ang atong relasyon.”
“Sa unsang katarongan?”
“Tungod kay dili ko gustong madiskaril ang akong showbiz career. Nasayod ka na tingali nga ka-loveteam nako si Jerome Celesta. -- Sumpayan pa