Gula 58
“Nindot ang palibot ning dapit nga imong gipuy-an,” komplimento ni Flip. “Peaceful ug mora’g dili kaayo delikado batok sa mga daotang elemento.”
“Tinuod kana,” ni Jackie pa. “Pero layo sa Manila.”
“Okey lang. May kaugalingon ka man nga sakyanan.”
Daklit nga mipatunga kanila ang kahilom.
“Abi ko’g dili nimo tinud-on ang imong gisulti nako nga moanhi ka,” ni Jackie pa.
“Tinud-anay tong ako, uy,” ni Flip. “May mahinungdanon kong tuyo nimo.”
Wala magdahom si Jackie nga ang pagbisita ni Flip kaniya nagdala sa katuyoan nga may kalabotan ang kasingkasing. Nangulitawo si Flip kaniya.
“I love you, Jackie,” wala’y pag-ukon-ukon nga pagpadayag sa lalaki sa gibati niini ngadto kaniya.
“Bag-o pa gani tang nagkaila, nangulitawo ka na dayon nako?” Sikmat ni Jackie nga wala magpadala sa mga abla sa lalaki.
“Ikaw lang ang bag-o pang nakaila nako. Alang nako, dugay na kong nakaila nimo tungod kay kanunay kong nagsunod sa imong kalihokan sa showbiz.”
“Tingalig nakalitan ka lang, Flip?”
“I know my feelings. Nakaseguro ko nga gugma ang gibati ko alang nimo.”
“Practically, naa pa ta sa getting to know each other period. Wala pa ko makaila sa hingpit sa imong pagkatawo mao nga dili pa ko makahatag nimo og commitment. Tingali’g may asawa ka na. Dili ko gustong makaguba og pamilya.” -- Sumpayan pa