Gula 55
Sa gitug-an ni Flip, natugkad gilayon ni Jackie kun unsa kining matanga sa pagkatawo. Usa kini ka bigtime businessman ug milyonaryo.
Naputol sa makadiyot ang ilang panagsulti sa dihang miabot ang waiter nga naghatod sa pagkaon nga gi-order ni Jackie. Gipahimuslan na lang usab ni Flip ang pag-order sa gusto niyang pagkaon. Gitugon niini ang waiter nga naghatod sa pagkaon ni Jackie.
Wala una kan-a ni Jackie ang iyang pagkaon. Gihulat niya nga moabot ang pagkaon nga gi-order ni Flip aron magdungan na lang sila sa pagpangaon. Samtang naghulat, nagkalingaw una sila’g kulukabildo.
Dihang miabot na ang pagkaon nga giorder ni Flip, nagpadayon ang ilang panagsultihanay. Daghan ang mga kasayoran nga gibutyag ni Flip mahitungod sa pagkatawo niini nga iyang nasayran.
Natapos ang ilang panagsulti sa dihang nakahukom na silang manggawas sa French restaurant nga ilang gikan-an. Apan sa wala pa sila manggawas sa hingpit sa maong kan-anan, may gihatag si Flip kang Jackie. Usa ka bag-ong brand sa cellphone nga gama sa kompaniya nga gipanag-iya niini.
“Pila man kini?” Sukit ni Jackie.
“Mahalon kanang maong cellphone kun imong paliton sa tindahan,” matud ni Flip. “Hinuon, nasayod kong maka-afford ka gyud. Apan agi’g handumanan sa atong panaghimamat, iregalo ko kana kanimo.” -- Sumpayan pa